Имрӯз дар меҳмонхонаи “Ҳаят Реҷенсӣ”-и шаҳри Душанбе бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Хазинаи кӯдакони СММ (ЮНИСЕФ), Шӯрои кор бо ҷавонони Созмони Ҳамкориҳои Шанхай ва Шӯрои миллии кор бо ҷавонони ИДМ Форуми байналмилалии ҷавонон таҳти унвони “Беҳтарин лоиҳаҳои соҳибкории ҷавонон” бо ҷалби соҳибкорони ҷавони давлатҳои аъзои СҲШ ва ИДМ баргузор гардид.

Дар форуми мазкур роҳбарияти вазорату идораҳои дахлдор, намояндагони сафоратхонаҳои муқими Душанбе, ҷавонони фаъол ва намояндагони СҲШ ва ИДМ тариқи онлайнӣ аз кишварҳои Белорусия, Хитой, Қазоқистон, Қирғизистон, Ӯзбекистон ва Русия иштирок ва суханронӣ намуданд.

Дар ибтидо кори ҷавонони фаъоли кишвар, ки дар Озмоишгоҳи инноватсионӣ таҳти барномаи “Пешсаф” коркард карда мешавад, ба намоиш гузошта шуда, ҷавонон ҳунари худро ба дигарон муаррифӣ намуданд.
Сипас дар оғози форум Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамаи иштирокчиён ва меҳмононро ба муносибати 30-солагии Истиқлолияти давлатии Ҷумҳурии Тоҷикистон, 30-солагии Иттиҳоди давлатҳои мустақил ва 20 - солагии таъсисёбии Созмони Ҳамкориҳои Шанхай табрик гуфта, таъкид намуд: “Умедворам, ки фазои сулҳу осоиш дар ҳамаи кишварҳои СММ доимо ҳукмфармо бошад. Мо аз ҳамкорӣ бо давлатҳои мустақил хеле шод буда, кӯшиш мекунем, ки ин муносибати хуби мо дар оянда боз ҳам беҳтар гардад”.

Дар идома Ҳикматуллозода Неъматулло, намояндаи Ҳукумати Ҷумҳурии Тоҷикистон, ёрдамчии Президенти Ҷумҳурии Тоҷикистон оид ба масъалаҳои иқтисодӣ суханронӣ намуда, таъкид кард, ки мақсади ин ҷамъомад аз фаъолияти ҷавонони фаъоли кишвари худ, ки дар дигар давлатҳо фаъолияти хуб нишон медиҳанд, огоҳӣ доштан аст. “Аз омор чунин бармеояд, ки шумораи ҷавонони мо берун аз кишвар зиёд буда, фаъолияти хуб нишон медиҳанд. Ман барои он ҷавононе, ки фикри имрӯзу фардои худро мекунанд, бурдбориҳо мехоҳам”.
Осама Маккави, роҳбари намояндаи Хазинаи кӯдакони СММ дар Ҷумҳурии Тоҷикистон зимни суханрониаш гуфт: “Хеле хушҳолам, ки дар чунин форум иштирок мекунам. Дар ин ҷо шумораи зиёди ҷавонон ҳастанд ва ҳаминро гуфтаниам, ки мақсади асосии мо огоҳ шудан аз касбу кори ин ҷавонони лаёқатманд аст, то тавонем онҳоро дастгирӣ кунем. Ҷавононе, ки ягон идеяи нав барои тиҷоратро дорад, ба ин гуна ҷавонон мо метавонем ҳамкорӣ кунем ва онҳоро ба дигарон муаррифӣ созем. Имрӯз ман зимни фестивал дарк намудам, ки Тоҷикистон беҳтарин соҳибкорони ҷавон дорад. Тасмим гирифтам, ки дар оянда бо ин ҷавонон ҳамкорӣ кунам”.

Дар рафти форум ҳамзамон Ковалёва Татяна, сардори департаменти кор бо ҷавонони котиботи Иттиҳоди Давлатҳои Мустақил ва Татяна Селиверства, муовини сардори раёсати лоиҳаҳо ва барномаҳои ҷавонони Агентии федериалии кор бо ҷавонони Федератсияи Русия тариқи онлайнӣ суханронӣ намуданд.