19 март дар толори Қасри ҷавонони ба номи Лоиқ Шералии шаҳри Хуҷанд бо иштироки Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамоиши гирандагони Стипендияи Президенти Ҷумҳурии Тоҷикистон таҳти унвони “Ҷавонон-пайрави Пешвои миллат” доир гардид.

Дар ҳамоиши мазкур зиёда аз 476 нафар гирандагони Стипендияи Президенти Ҷумҳурии Тоҷикистон аз 10 шаҳру ноҳияи вилояти Суғд фаъолона иштирок намуданд.

Нахуст, меҳмонон аз намоиши варзишии варзишгарони вилоят ва аз намоиши маҳсули дасти ҷавондухтарони ҳунарманд дидан намуда, ба ҳунари онҳо баҳои баланд доданд.

Ҳамоишро Анвар Яъқубӣ, муовини раиси вилояти Суғд оғоз бахшида, иброз дошт, ки Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон нисбати тақдири имрӯзу фардои ҷавонон таваҷҷуҳи хоса доранд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни баромади хеш таъкид намуд, ки сиёсати давлатии кор бо ҷавонон дар меҳвари сиёсати Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон қарор дорад. Таъсис ёфтани Стипендияи Президенти Ҷумҳурии Тоҷикистон барои наврасону ҷавонон намунаи олии таваҷҷуҳи Пешвои миллат нисбат ба насли ояндасози кишвар мебошад.

Гуфта шуд, ки Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон ҷавононро неруи тавонои созанда ва пешбарандаи ҳамаи соҳаҳои ҳаёти мамлакат меҳисобад ва ҳалли мушкилоту масъалаҳои вобаста ба зиндагӣ ва таҳсилу фаъолияти онҳоро ҳамчун самти афзалиятноки сиёсати иҷтимоии худ эътироф менамояд. Стипендияи Президенти Ҷумҳурии Тоҷикистон барои хонандагони болаёқат аз соли 1998 таъсис ёфта, дар ҷумҳурӣ 300 нафарро дар бар мегирифт. Хушбахтона, имрӯз он ба 3000 нафар расида, дар як ноҳия аз 3 нафари қаблӣ ба 30 нафар расонида шудааст.

Дар охир аз ҷониби раиси Кумита ба гирандагони Стипендияи президентӣ дар соли таҳсили 2023-2024 маблағҳои ҷудогардида ва шаҳодатномаҳо тақдим карда шуд.