Дирӯз, 18 август Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати ҷумҳурӣ бо сафари корӣ ба шаҳри Истаравшан ташриф овард.

Нахуст раиси Кумита, аз Коллеҷи ҳунарҳои мардумӣ дидан намуда, бо кори дастии донишҷӯёни ин муассисаи таълимӣ шиносоӣ пайдо намуда, ба кори устодону шогирдон баҳои баланд дод.

Дар ифтитоҳ, Наим Набизода, раиси шаҳри Истаравшан, раиси Кумита ва меҳмононро барои ташрифашон ба шаҳри Истаравшан минатдорӣ карда, ҳамаи онҳоро ба ин шаҳри бостони хайрамақдам гуфт.

Сипас, А.Абдуллозода дар Қасри фарҳанги шаҳри Истаравшан, бо наврасону ҷавонон ва сокинони шаҳр мулоқот намуд. Ӯ зимни мулоқот аз дастовардҳои даврони соҳибистиқлолии кишвар ёдрас гардида, аз ҷавонон даъват ба амал овард, ки дар тарғиби фарҳанги миллӣ, ҳифзи арзишҳои миллӣ, пешгирии гаравиши насли наврасу ҷавон ба ҳизбу гурӯҳҳои номатлуб саҳм гузоранд.

Баъд аз мулоқот Аҳтам Абдуллозода аз курсҳои омӯзишии қаннодии ройгон таҳти унвони «Ҳунар беҳ аз симу зар», ки дар Хонаи таълимию истироҳатии шаҳр ҷойгир аст аз наздик шинос шуд.

Тавре маълум гардид дар курси мазкур зиёда аз 15 нафар духтарони ҷавон касби қаннодиро аз худ намуда, соҳиби шаҳодатнома гардиданд.

Ҳамзамон, раиси Кумита аз ҳолати толорҳои Мактабҳои варзишиие, ки дар ҳудуди шаҳри Истаравшан воқеъ буда дидан намуда, ба масъулин дастуру супоришҳо дод.