Ба мақсади суръат бахшидан ба корҳои сохтмонӣ ва бунёди хонаҳо барои сокинони аз офати табиӣ зарардидаи ноҳияи Дарвоз як гурӯҳи корӣ иборат аз 30 нафар ҷавонони фаъол таъсис дода шуд.

Ба гуфтаи Расулҷон Шокиров, мудири Бахши кор бо ҷавонон ва варзиши ноҳияи Дарвоз, гурӯҳи махсус аз тарафи Бахш ташкил гардида, ҳоло дар деҳаи Хостави мавзеи Яхчисори Дарвоз фаъолияти ҳаррӯза дорад.

Ҳамчунин баробари гурӯҳи корӣ ризокорон ва ҷавонони ҷамоатҳои деҳоти ноҳия аз рӯзҳои аввали сар задани офати табиӣ дар ин мавзеъ ба корҳои созандагӣ машғуланд.

Айни замон таҳкурсии беш аз 8 хонаи истиқоматӣ гузошта шуда, марҳилаи аввал ва дуюми корҳои сохтмонӣ идома дорад. Дар назар аст, ки ҳамаи хонаҳо пеш аз мӯҳлати муқарраргардида ба истифода дода мешаванд.

Машҳур ИМОМНАЗАРОВ, “ҶТ”