26-уми октябр дар факултети санъати Донишгоҳи давлатии Хуҷанд вохӯрии судманд оид ба хатарҳои ҷомеаи муосир ба ҷавонон бо донишҷӯёни донишгоҳ баргузор гардид.

Вохӯриро муовини ректор оид ба тарбия, профессор Аюб Усмонзода ифтитоҳ намуда, қайд кард, ки терроризм ва ифротгароӣ яке аз зуҳуроти номатлуб дар замони имрӯза ба шумор меравад. Аз ин лиҳоз моро мебояд дар самти ҳифзи арзишҳои миллӣ, дастовардҳои замони соҳибистиқлолӣ, баланд бардоштани сатҳи донишҳои сиёсию ҳуқуқӣ ва пешгирии падидаҳои манфӣ дар байни ҷавонон камари ҳиммат бандем.

Сипас, муовини озоди филиали Иттифоқи ҷавонони Тоҷикистон дар вилояти Суғд Фахриддинзода Фирдавс сухан намуда, зикр кард, ки айни замон марбут ба амалҳои террористӣ вазъи сиёсӣ дар ҷаҳон нигаронкунанда боқӣ мемонад. Сарфи назар аз тадбирҳои солҳои охир андешидашуда дар бахши мубориза бо терроризм, таҳдиди амалҳои нави террористӣ аз байн нарафта, балки афзоиш ёфтааст. Дар гӯшаҳои гуногуни ҷаҳон фаъолшавии созмону ташкилотҳои террористӣ ба мушоҳида мерасад.

Дар идомаи чорабинӣ аз ҷавонон даъват ба амал оварда шуд, ки дар ҳама ҳолат зираку ҳушёр бошанд ва фирефтаи ақидаҳои ифротиву иртиҷоӣ нагарданд.