Сафи омӯзгорони унвондор дар Донишкадаи тарбияи ҷисмонии Тоҷикистон ба номи С. Раҳимов сол то сол зиёд гардида, то имрӯз шумораашон ба 23 нафар расидааст.

Дар ин бора Амир Иброҳимзода ректори навтаини Донишкада имрӯз - 6 феврал зимни нишасти матбуотӣ ба рӯзноманигорон хабар дод.

Ӯ гуфт, ки соли равон як нафар омӯзгори ҷавон диссертатсияи номзадии худро дар соҳаи педагогика дифоъ намуда, 5 нафар бо фармоиши Комиссияи олии аттестатсионии назди Президенти Ҷумҳурии Тоҷикистон соҳиби унвонҳои дотсентӣ гардиданд.

Ҳамчунин номбурда изҳор намуд, ки бобати ҳавасмандӣ ба омӯзгороне, ки тадқиқотҳои илмӣ анҷом медиҳанд, бо карори Шурои олимон 10 ҳазор сомонӣ барои ҳимояи рисолаи номзадӣ ва 16 ҳазор сомонӣ барои дифои рисолаи докторӣ муайян карда шуд, ки нисбат ба соли қаблӣ маблағи ҳавасмандӣ барои рисолаи номзадӣ 4 ҳазор ва рисолаи докторӣ 6 ҳазор зиёд карда шуд. Бобати фарогири ба курсҳои бозомӯзӣ ва семинару мизҳои мудаввар, соли 2024 63 нафар омӯзгорон аз такмили ихтисос ва курсҳои бозомӯзӣ гузаштанд, ки нисбати соли 2023 24 нафар бештар ҷалб гаштанд.

- Бояд гуфт, ки густариши робитаҳои байналмилалӣ яке самтҳои асосии фаъолияти Донишкада ба ҳисоб рафта, Донишкада дар айни ҳол бо 35 донишгоҳҳои хориҷи дуру наздик ҳамкорӣ дорад. Ҳамчунин роҳбарияти Донишкада азм дорад бо Шӯъбаи робитаҳои ҷамъиятии Сафоратхонаи Амрико дар Тоҷикистон, Сафоратхона ва ройзании фарҳангии Ҷумҳурии Исломии Эрон, ташкилотҳои байналхалқии ТИКА, АССЕТІБ, ІЕЕХ, АА, О17, АСТЕР ва ғайраҳо робитаҳои ҳамкорӣ барқарор намояд. Инчунин, барои ҷалби донишҷӯён аз кишварҳои хориҷи дуру наздик ба Донишкада мунтазам чораҳо амалӣ карда мешаванд. Айни замон, дар донишкада 46 нафар донишҷӯ аз Ҷумҳуриҳои Узбекистон, Туркманистон, Ҷумҳурии Исломии Афғонистон, Ҷумҳурии Исломии Покистон ва Федератсия Россия таҳсил намуда истодаанд. - гуфт А. Иброҳимзода.

Наҷиба МУРОДБЕКОВА, "ҶТ"