21 май, зери ин ном дар толори Вазорати рушди иқтисод ва савдо бахшида ба Рӯзи ҷавонони Тоҷикистон мулоқоти собиқадорони соҳаҳои гуногун бо ҷавонон доир гардид. 

Дар мулоқот Аҳтам Абдуллозода, раиси Кумитаи кор бо ҷавонон ва варзиш, Маликшо Неъматов, Ғайбулло Афзалов, Муҳаммад Ғоиб, Гулназар Келдӣ, Назри Яздон, Мирзошоҳрух Асрорӣ ва дигар ходимони давлатӣ, фарҳангӣ ва адабӣ иштирок ва суханронӣ намуданд. 

Аҳтам Абдуллозода, раиси Кумитаи кор бо ҷавонон ва варзиш, чорабиниро ифтитоҳ бахшида, нахуст тамоми иштирокчиёнро ба Рӯзи ҷавонон табрик гуфтанд. 

Раиси Кумита иброз доштанд, ки ҷавонон давомдиҳандаи кору фаъолияти насли калонсол, неруи созанда ва иқтидори воқеии пешрафтаи ҷомеа ва ояндаи давлату миллат мебошанд. Инсон ба гузаштаи худ назар карда, ба худ суол медиҳад, ки чи бояд кард, то зиндагии хубе дошта бошаду баҳри халқу ватанаш кори хуберо анҷом диҳад. Ҷавонон ки таҷрибаи корияшон нисбати калонсолон камтар аст, ҳамеша аз таҷрибаи кордидагон меомӯзанд ва бо истифода аз анъана ва арзишҳои хуби ниёгон дар ҳама самт ба дастовардҳо ноил мегарданд. 

Гуфта шуд, ки ҷавонон бояд ба қадри оромию осиштагӣ ва Ваҳдати миллӣ бирасанд. Зеро он неъмати бебаҳо буда, дар натиҷаи ҷонбозиҳову талошҳои пайвастаи ҷавонмардони миллат, бахусус Президенти кишвар муҳтарам Эмомалӣ Раҳмон ба даст омадааст. То он ки давлати Тоҷикистон дар харитаи сиёсии ҷаҳон пайдо шавад, шахсиятҳои миллат меҳнати шабонарӯзӣ намуда, истиқлолияти комилро дар сартосари кишвар таъмин намуданд ва гурезагони ҷанги шаҳрвандиро аз ғурбат баргардониданд. Дар ин росто ҷиҳати таъмини амнияти миллӣ ва сулҳу субот саҳми Пешвои муаззами миллат муҳтарам Эмомалӣ Раҳмон бениҳоят бузург аст. Бояд ҳар яки мо, чи хурду бузург пайрави асили Пешвои миллат бошему дар фаъолияти худ аз хислатҳои хирадмандони ин шахсияти таърихӣ истифода намоем. Зеро ҳар як комёбии Роҳбари давлат дар таъмини амнияти миллӣ ин инсондӯсту мардумшинос будан ва содиқ будан дар ваъдаи худ сарчашма мегирад. Ҳар ваъдае, ки Президенти кишвар ҷиҳати ободонии ҷумҳурӣ аз ибтидои соҳибистиқлолӣ ба мардуми шарифи Тоҷикистон намуда буданд, онро ба таври зарурӣ ва аз будаш зиёд анҷом доданд, ки боиси таҳсин аст. 

Дар идома иштирокчиёни дигар вобаста ба муҳим будани даврони ҷавонӣ дар ҳаёти инсон, чи гуна сипарӣ намудани ин айёми сохтанҳо, омӯхтани таҷрибаи калонсолон ҷиҳати фаъолияти самаранок доштан ва муҳимтар аз ҳама чи бояд кард, то як фарди бонангу номус гардида, баҳри Ватани азизамон Тоҷикистон хизмати содиқона кард, суханронӣ намуданд. 

Дар интиҳои мулоқот суолу ҷавоб сурат гирифта, ҷавонон ба саволҳои худ аз собиқадорони соҳаҳои гуногун ва масъулини кор бо ҷавонон посухҳои мушаххасу дақиқ гирифтанд.