Фирдавс Дадоҷонзода ва Алишер Воҳидов донишҷӯёни курси чоруми ихтисоси технология ва низоми иттилоотӣ дар иқтисодиёти факултети технологияҳои иттилоотӣ дар иқтисодиёти Донишкадаи молия ва иқтисоди Тоҷикистон мебошанд. Ҳардуи ин донишҷӯ бо навоварӣ, ихтироъкорӣ ва рафтори намунавиашон фарқ мекунанд.

Фирдавс Дадоҷонзода аз солҳои аввали донишҷӯӣ ба татбиқи лоиҳаи “Донишкадаи электронӣ” машғул шуда, соли 2017 муаррифии ин лоиҳа дар Донишкадаи молия ва иқтисоди Тоҷикистон баргузор гардид.

“Ин лоиҳа барои автаматикунонии тамоми ҷанбаҳои донишкада мусоидат мекунад. Гуфтан мумкин аст, ки он бахше аз лоиҳаи “Душанбеи электронӣ” мебошад, ки дар дохили он “Донишкадаи электронӣ”-ро ҷой додаем. Дар ин барнома китобхонаи электронӣ, журнали синфӣ, эълонҳо, ҷадвали дарсҳо, натиҷаҳои имтиҳоноти тестӣ ҷой дода шудааст. Инчунин тамоми натиҷаи дарсазхудкунӣ ва баҳои донишҷӯёнро тавассути паёмак (sms) метавон ба волидон равона сохт. Вале барои дар амал татбиқ намудани он дастгирӣ ва имкониятҳои молиявӣ лозим аст”, - мегӯяд Фирдавс.

Фирдавс барои пеш бурдани фаъолияти web-барномасозӣ аз ҷониби ширкати «Zend.com» соҳиби ду сертификат шудааст. Ин барояш имконият медиҳад, ки ба ширкатҳои машҳури олам, ба монанди Google ё Yandex барои кор ё ҳамкорӣ муроҷиат намояд.

Ӯ нақша дорад, ки барномаи махсусе бо номи “Маълумотномаи Тоҷикистон” тартиб диҳад. Он барои таваҷҷуҳи бештари сайёҳон ба кишвари биҳиштосои мо мусоидат менамояд. Зеро дар он маълумот дар бораи ҷойҳои диққатҷалбкунандаи таърихӣ, фарҳангӣ ва табиати нотакрори Тоҷикистон ҷой дода мешавад.

Алишер Воҳидов бошад, пас аз хатми мактаби миёнаи 57-и ноҳияи Ёвон ба пойтахт омада, тасмим гирифт маҳз ба ДМИТ дохил шавад. Зеро аз давраи мактабхонӣ ба информатика ва технологияи иттилоотӣ шавқи махсус дошт. Ин буд, ки дар олимпиадаҳои ноҳиявӣ ва вилоятӣ ҳамеша дастболо мешуд.

Соли 2016 дар шаҳри Хуҷанд дар озмуни ҷумҳуриявии “Навоварон ва ихтироъкорони ҷавон” иштирок карда, сазовори ҷойи сеюм гардид. Лоиҳаи пешниҳоднамудаи ӯ “Имзои электронӣ” дар байни корҳои озмунӣ аз беҳтаринҳо дониста шуд. Ин лоиҳа барои ҳифзи маълумот кӯмак мерасонад.

Ӯ, инчунин, соли гузашта дар олимпиадаи ҷумуриявии донишҷӯён дар Академияи илмҳои Ҷумҳурии Тоҷикистон аз фанни информатика иштирок намуда, сазовори ҷойи чорум ва ифтихорнома гардид.

Ин ду ҷавони ихтироъкор дар оянда нақшаҳои зиёд доранд. Мо ба Фирдавс ва Алишер барору комёбӣ таманно дорем. Умедворем, ки барномаҳои нави ҷолибро ихтироъ ва пешниҳод намуда, дар татбиқи сиёсати электронии кишвар саҳми арзандаи худро мегузоранд.

Насрулло ТӮЙЧИЗОДА