Имрӯз дар Осорхонаи миллии Тоҷикистон ҳамоиши шаҳрии ҷавонон таҳти унвони “Ташаббусҳои байналмилалии Пешвои миллат наҷотбахши сайёра ва таъмингари ҳаёти осоишта” доир гардид.

Дар ҳамоиш Дилбар Одилзода, муовини раиси шаҳри Душанбе, Шабнам Раҳимзода, муовини аввали раиси Кумитаи кор бо ҷавонон ва варзиши назди Ҳукумати кишвар, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, Ато Мирхоҷа, муовини раиси Иттифоқи нависандагони Тоҷикистон, Саидаҳтам Талбаков, сардори Раёсати таҳлил ва ояндабинии сиёсати дохилии Маркази тадқиқоти стратегии назди Президенти Ҷумҳурии Тоҷикистон, Зиёзода Субҳиддин, муовини раиси Шурои олимони Академияи миллии илмҳои Тоҷикистон, Зафаршо Иброҳимзода, директори Осорхонаи миллии Тоҷикистон ва Хушвахт Шарифзода, сардори Раёсати тандурустии шаҳри Душанбе иштирок ва суханронӣ намуданд.

Ҳамоишро Шоҳзод Раҳимзода, сардори Раёсати кор бо ҷавонон ва варзиши шаҳри Душанбе оғоз кард.

Зимни суханрониҳо масъулин ба ҳозирин - иштирокчиёни сеюмин Фестивали дӯстии ҷавонони шаҳри Душанбе таҳти унвони “Ҷавонон – пайравони Пешвои миллат ва меросдори анъанаҳои Наврӯзӣ”, гирандагони Стипендияи президентӣ ва донишҷӯёни хориҷии дар донишгоҳу донишкадаҳои ҳудуди пойтахт таҳсилдошта аз ташаббусҳои байналмилалии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ба нафъи мардуми сайёра самараи мондагор нишон дода истодаанд, ибрози назар намуданд.

Гуфта шуд, боиси ифтихор ва сарфарозист, ки маҳз дар заминаи ҳидоятҳои падаронаи Президенти Ҷумҳурии Тоҷикистон, муҳтарам Эмомалӣ Раҳмон ва ташаббусҳои наҷибу пайваста ва дурбинонаи раиси шаҳри Душанбе муҳтарам Рустами Эмомалӣ сиёсати давлатии ҷавонон ба яке аз самтҳои муҳими стратегии кишвар ва пойтахти он табдил ёфта, дар замони соҳибистиқлолии мамлакат ба қишри ҷавони ҷомеа дар марҳилаи бунёди давлати навини тоҷикон ҳамчун созандагони ояндаи Тоҷикистони соҳибистиқлол таваҷҷуҳ ва боварӣ карда шуд.

Дар идома вобаста ба ҷашни Наврӯз таъкид гардид, ки Наврӯз арзандатарин ва гиромитарин мероси ниёгони мост, ки моро ба таърихи куҳани аҷдодонамон мепайвандад. Он оғози сол, ҷашни бузурги бедории табиат, эҳёи анъанаи миллии мардумӣ, рамзи пирӯзӣ бар торикӣ ва тантанаи некиву накӯкорӣ маънидод мегардад.

Ҷонибек ДАВРОНОВ, “ҶТ”