17 июл дар ҳошияи суханронии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолон ва аҳли ҷамоатчигии кишвар бахшида ба 10-солагии амали Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” дар Маркази ҷавонони шаҳри Душанбе ҳамоиши ҷавонони Душанбешаҳр баргузор гардид.

Дар ҳамоиш намонядагони мақомоти иҷроияи ҳокимияти давлатии шаҳри Душанбе, кумитаҳои кор бо ҷавонон ва варзиш, оид ба корҳои дин, танзими анъана ва ҷашну маросимҳои миллӣ, кор бо занон ва оила, Маркази тадқиқоти стратегӣ, вакилони Маҷлиси вакилони халқи шаҳри Душанбе иштирок ва суханронӣ намуданд.

Зикр гардид, ки дар ҳақиқат, бо амалӣ гардидани қонун дар сатҳи хонаводаи ҳар як сокини кишвар бо камхарҷ гузаронидани маъракаҳову пасандоз намудани маблағҳои зарурӣ, мо - ҷавонон ба ҳилли бисёр мушкилоти рӯзгор, аз ҷумла, фароҳам овардани шароит барои таҳсилу забономӯзӣ, машғул ва комёб шудан ба дастовардҳои илмиву варзишӣ, аз худ кардани касбу ҳунар, дохил шудан ба бонуфузтарин муассисаҳои оливу касбии дохил ва хориҷи кишвар, фароҳам овардини шароити хубу саъодатманди рӯзгору истироҳат ва дастгириву саховат ба ниёзмандон ноил мегардем.

Ҳамчунин қайд шуд, ки ҷавонон чун нерӯи созанда ва пуриқтидори ҷомеа, метавонанд барои амалӣ намудани муқаррароти қонуни мазкур саҳми босазо гузоранд. Таре таъкид шуд, ҷавононро зарур аст, ки дар баробари ин, ҳама арзишҳои фарҳангии хешро ҳифз намоянд ва аз тарғиботи зарарнок тавассути баъзе шабакаҳои интернет худро эмин доранд. Инчунин, ҷавонон барои ҳидояти ҳамсолон, ҳамсоягон ва аҳли хонавода ҷиҳати худдорӣ намудан аз зуҳуроти бегонапарастиву тақлид, таассубу зиёдаравӣ ҳангоми баргузории як қатор маросиму маъракаҳо, зоҳирпарастӣ бо пӯшидани либосҳои сиёҳу торик, ки арзишҳои фарҳанги миллии моро поймол ва фазои маънавии ҷомеаро тира сохтаистодаанд, саҳмгузор бошанд.

Ҷавонони Душанбешаҳр дар навбати худ аз дастгириву таваҷҷуҳи Асосгузори сулҳу Ваҳдати миллӣ -Пешвои муаззами миллат нисбати ин қишри ояндасоз изҳори сипос намуда баён доштанд, ки саъй менамоянд, то бо сарфаву сариштакорӣ ва пурдабдаба нагузаронидани маъракаҳои диниву миллӣ ва хонаводагӣ ба иқтисодиётии оила ва, дар маҷмуъ, ҷомеа ҳиссагузор бошанд.

Маврид ба зикр аст, ки чунин чорабинҳо миёни ҷавонон ва сокинони касбу кори гуногуни шаҳри Душанбе дар сатҳи ноҳияҳо, шаҳраку маҳаллаҳо ва дигар ташкилоту муассисаҳо доир гардидаистодаанд, ки дар баробари тарғиби масъалаҳои танзими анъана ва ҷашну маросимҳо дигар мавзуъҳои вобаста ба ҳаёти ҷавонон, аз ҷумла пешгирии хуруфотпарастӣ, ҷинояткорӣ, нагаравидан ба ҳизбу ҳаракатҳои моҷароҷу, никоҳи барвақтӣ ва монанди инро дар бар мегиранд.