Дар китобхонаи марказии шаҳри Хоруғ ба номи Ҳофизи Шерозӣ бо иқдоми муассисаи давлатии "Маркази ҷавонони ВМКБ" мизи мудаввар баргузор гардид.

Дар он намояндагони Раёсати кор бо ҷавонон ва варзиши вилоят, донишҷӯёни Донишгоҳи давлатии Хоруғ ба номи Моёншо Назаршоев, толибилмони МТМУ№2 ба номи Давлаталӣ Шабдолов оид ба мавзӯъҳои Рӯзи модар эълон гаштани 8 март, нақши занон дар идоракунии сохтору муассисаҳои гуногун, зан - модар ва мартабаи ӯ дар ҷаҳони муосир фикру андешаҳои худро баён намуданд.

Ташаббускори чорабинӣ ва намояндаи муассиса Дидоршоҳ Насриддинов изҳор дошт, ки чунин мизи гирд ба хотири гиромидошти Рӯзи модар, дар ниҳоди наслҳои ҷавону наврас бедор намудани ҳисси масъулиятшиносӣ, эъзозу эҳтироми ҳамешагӣ нисбати модарону хоҳарон ташкил шудааст.

Ҳамчунин, аз ҷониби муҳассилину хонандагон дар васфи зан - модар ашъори баландмазмун қироат гардид.