ҶАВОНОН
Сешанбе 07 Декабр 2021 01:56
8063
Сиёсати давлатии ҷавонон дар фаъолияти давлату Ҳукумати мамлакат аз рӯзҳои аввали соҳибистиқлол гардидани кишвари мо мавқею манзалати хосаро касб намуда, мақомоти давлатӣ ба амалишавии самараноки он манфиатдор мебошад.

Назару интизориҳои Ҳукумати ҷумҳурӣ аз ҷавонон бисёр нек арзёбӣ гардида, барои тақвияти сиёсати давлатӣ дар ин самт, ҳавасмандгардонӣ ва дастгирии ин қишри аз лиҳози ҷисмонию зеҳнӣ тавонманди ҷомеа ҳамарӯза тадбирҳои амалӣ роҳандозӣ карда мешаванд.

Ин аст, ки масъалаи ҷавонон ва беҳдошти вазъи ҳаёт ва фаъолияти онҳо ҳамчун масъалаи меҳварӣ дар фаъолияти давлат ва Ҳукумати кишвар қарор дорад. Бо назардошти муҳимияти ин масъала оғоз аз соли 1994 – ум пайваста мулоқотҳои судманди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷавонони кишвар баргузор мешаванд.

Зимни мулоқотҳояшон бо ҷавонони кишвар Пешвои муаззами миллат вобаста ба дучанд намудани имконоти худташаккулёбии ҷавонон тадбирҳои амалиро роҳандозӣ менамоянд, ки дар зарфи 30 соли даврони соҳибистиқлолии кишвар дар заминаи баргузории чунин мулоқотҳои манфиатбор ҳанӯз моҳи майи соли 1997 Фармони Президенти Ҷумҳурии Тоҷикистон “Оид ба баъзе масъалаҳои беҳтар кардани кор бо ҷавонон” ба тасвиб расид ва аз ҳамон сол санаи 23 май ҳамчун “Рӯзи ҷавонони Тоҷикистон” эълон карда шуда, мақоми ваколатдори давлатӣ дар самти кор бо ҷавонон – Кумитаи кор бо ҷавонони назди Ҳукумати Ҷумҳурии Тоҷикистон таъсис дода шуд. Инчунин соли 1998 стипендияи Президенти Ҷумҳурии Тоҷикистон барои хонандагони мактабҳои таҳсилоти умумӣ, литсейҳо, гимназияҳо, омӯзишгоҳҳои касбӣ – техникӣ, омӯзишгоҳҳо ва коллеҷҳо, моҳи марти соли 1998 Ҷоизаи ба номи Исмоили Сомонӣ барои олимони ҷавоне, ки дар соҳаи илму техника корҳои намоён анҷом додаанд, ҷоизаи Кумитаи ҷавонон, варзиш ва сайёҳӣ дар соҳаи адабиёт, санъат, меъморӣ, рўзноманигорӣ ва барномасозӣ таъсис дода шуданд, ки то ба имрўз на фақат амалӣ гардида истодаанд, балки ба маротиб зиёд карда шудаанд.

Ин навбат низ Пешвои муаззами миллат зимни мулоқоташон бо ҷавонони мамлакат, ки дар арафаи таҷлили 30 – солагии Истиқлолияти давлатӣ санаи 21 майи соли ҷорӣ дар толори Кохи “Борбад” доир гардид, паҳлуҳои мубрами марбути ҳаёт ва фаъолияти ҷавононро таҳлил намуда, бо таъкиди масъалаҳои рӯй овардан ба омӯзиши илм, забондониву рушди малакаҳои касбӣ, ҳушёрии сиёсӣ, донишу маърифати баланд, одобу ахлоқи шоиста, донистани таъриху фарҳанги пурғановати миллати тоҷик, ҳифзи манфиатҳои миллӣ ва арҷ гузоштан ба муқаддасоти давлатӣ мулоқоти судмандро анҷом доданд.

Дар баробари мавриди таҳлилу пешниҳоди дурнамо қарор додани ҷабҳаҳои гуногуни ҳаёти ҷавонон Президенти Ҷумҳурии Тоҷикистон муҳтарам Эмомалӣ Раҳмон ба яке аз масъалаҳои муҳими ҷомеаи имрӯза – тақвият ва рушди фаъолияти волонтёрӣ низ таваҷҷуҳи хоса зоҳир намуданд.

Тақвияти фаъолияти волонтёриро ба хотири иттиҳоду ҳамбастагии ҷавонон ҷиҳати анҷом додани амалҳои хайрхоҳона, корҳои тозагиву созандагӣ, кӯмак ба шахсони ниёзманду пиронсолон дар шароити имрӯза афзал шуморида, ин тадбирҳоро барои худи волонтёрон мактаби муҳими худташаккулёбӣ ҳисобиданд.
Зеро таҷрибаи ҷаҳонӣ гувоҳи он аст, ки накӯкорӣ ва анҷоми амалҳои хайр ҷиҳати тарбияи шаҳрвандон дар рӯҳияи меҳнатдўстӣ, эҳтироми якдигарӣ, масъулиятшиносӣ, поквиҷдонӣ ва муттаҳидӣ заминаҳои мусоид фароҳам меорад. Ҳадафи асосии фаъолияти волонтёрӣ иҷрои корҳои хайриявӣ, бардошти таҷрибаи иҷтимоӣ барои шаҳрвандон, тавсеаи рушди шахсият, омўхтани таҷрибаи кор аз рўи ихтисоси интихобнамуда ва имкони шинохти худ дар ҷомеа мебошад.

Фаъолияти волонтёрӣ ин майдони оғози рушди касбии ҷавонон аст, ки робитаи ҷамъиятиашонро тавсеа медиҳад. Агар ба таърихи пурғановати халқамон назар афканем, пас дар он низ ризокориро зиёд мувоҷеҳ мегардем. Дар гузашта миёни мардуми мо шаклҳои ҳаракати волонтёрӣ, ба мисли ҳашар вуҷуд дошт. Кӯмак расонидан ва иҷрои корҳои ҷамъиятӣ аз қадим ба нафъи мардум буд, ки тавассути ин фаъолиятҳо бо ҳашар хона месохтанд, пулҳо бунёд менамуданд, дасти ҳамдигар мегирифтанд ва дигар мушкилоти худро бартараф мекарданд.

Аҳамияти ин амалҳо дар он буд, ки кореро, ки як нафар наметавонад дар танҳоӣ анҷом диҳад, мардум дастаҷамъона бо роҳи ҳашар дар муддати хеле кўтоҳ иҷро мекарданд. Ва ин таҷрибаи гирифтани дасти ҳамдигар ва интихоби роҳи сохтану бунёд кардану кӯмак намудан, дар замири насли ҷавони кишвар низ имрӯз тарбият ёфтааст, ки онҳо бо фаъолияти волонтёрӣ машғул мебошанд.

Бояд зикр намоем, ки бо қабули Қонуни Ҷумҳурии Тоҷикистон “Дар бораи фаъолияти волонтёрӣ” аз 19 сентябри соли 2013, №1019 ин самти фаъолияти ҷамъиятӣ рушд намуда, айни замон дар назди Кумитаи кор бо ҷавонон ва варзиш ва сохторҳои маҳаллии он ҳазорҳо нафар ҷавонон ба ҳайси волонтёр фаъолият намуда истодаанд.

Танҳо дар солҳои 2019 – 2020 аз ҷониби волонтёрон 11297 адад чорабинӣ ва корҳои хайри ҷамъиятӣ бо фарогирии 110 939 нафар ҷавонон амалӣ гардидааст.

Дар робита ба ин, волонтёрони Кумитаи кор бо ҷавонон ва варзиш ба шумораи умумӣ 10 000 нафар волонтёр дар сатҳи ҷумҳурӣ дар қисматҳои ташкилии баргузории маъракаҳои муҳими сиёсӣ дар соли 2020 ҷиҳати саҳмгузорӣ дар самтҳои гуногун, аз он ҷумла, барўйхатгирии интихобкунандагон, тақсимоти маводҳои иттилоотӣ, мусоидат дар баргузории суҳбату вохўриҳо бо мақсади баланд бардоштани маърифати ҳуқуқии аҳолӣ, иттилоотонии интихобкунандагон аз қонунгузории кишвар дар бораи интихобот, ҳамроҳии мушоҳидони байналмилалӣ, кӯмак расонидан дар участкаҳои интихоботӣ ба пиронсолон ва шахсони имконияташон маҳдуд омода карда шуда, инчунин 500 нафар волонтёри донандаи хуби забони англисӣ ва русӣ барои бевосита ҳамроҳӣ намудани мушоҳидони байналмилалӣ аз курсҳои омӯзишӣ гузаронида шуда, пурра омода карда шуда буданд, ки зимни бриффинг аз ҷониби коршиносони байналмилалӣ сазовори баҳои муносиб гардиданд.
Дар ин замина, дастури Пешвои муаззами миллат зимни мулоқоташон бо ҷавонони мамлакат санаи 21 майи соли 2021 вобаста ба таҳия ва ба Ҳукумати Ҷумҳурии Тоҷикистон пешниҳод намудани “Барномаи рушди фаъолияти волонтёрӣ дар Ҷумҳурии Тоҷикистон барои солҳои 2022-2025” тадбири бениҳоят муҳим ва саривақтӣ буда, муайян намудани самтҳои афзалиятноки фаъолияти волонтёрӣ, роҳҳои рушд ва ҷалби бештари ҷавонон ба ин фаъолият баҳри боз ҳам ободу зебо гардонидани ватани азизамон, дастгириву кӯмак ба камбизоатону пиронсолон, ашхоси ниёзманд ва корҳои хайри ҷамъиятӣ заминаи қавӣ мегузорад.

Дилноза АҲМАДЗОДА,
муовини раиси Кумитаи кор
бо ҷавонон ва варзиши
назди Ҳукумати Ҷумҳурии Тоҷикистон

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Декабр 2021 c.