Имрӯз, 3 апрел, дар назди муассисаи давлатии Театри мусиқӣ-драммавии ба номи Маҳмудҷон Воҳидови ноҳияи Ашт маросими гусели наваскарон ба сафи Қувваҳои Мусаллаҳи Ҷумҳурии Тоҷикистон баргузор гардид.

Дар маросими гусели наваскарони ихтиёрӣ раиси ноҳияи Ашт Зариф Мирдадо, прокурори ноҳия Сафарзода Баҳриддин Сафар, комиссари Комиссариати ҳарбии ноҳия Сулмонзода Қурбоналӣ, раиси КИ ҲХДТ дар ноҳияи Ашт Зиёӣ Баҳриддин, муовинони Раиси ноҳия, роҳбарони сохторҳои қудратӣ, роҳбарони корхонаву ташкилотҳо, раисони ҷамоату шаҳраки деҳоти ноҳия, сарбозон, падару модарони навдаъватшавандаҳо иштирок намуданд.

Зариф Мирдадо, раиси ноҳия дар баромади худ иброз дошт: “Барои мо фахри бузург аст, ки имрӯз ҷавонони мо аз ҷамоатҳои шаҳраку деҳоти ноҳия дар сафи Қувваҳои Мусаллаҳи Ҷумҳурии Тоҷикистон бо сари баланд адои хизмат мекунанд. Ман ба ҳамаи падарону модарон, роҳбарони муассисаҳои таълимӣ, ки чунин фарзандони боғуруру ватандӯстро бо меҳру муҳаббати самимӣ тарбия намудаанд ва бо амри дил имрӯз барои хизмати Ватан-Модар ҳозир гаштаанд, аз номи мақомоти иҷроияи ҳокимияти давлатии ноҳия арзи сипос менамоям”.

Дар ин маросим 70 нафар ҷавонон ба сафи Артиши миллӣ сафарбар шуда, дар охир аз тарафи мақомоти иҷроияи ҳокимияти давлатии ноҳияи Ашт ба ду нафар волидайн Сипоснома ва туҳфаи хотиравӣ тақдим гардид.