Бо ташаббуси Раёсати кор бо ҷавонон ва варзиши вилояти Суғд Фестивал-озмуни вилоятии “Суруди модар-алла” бахшида ба Рӯзи Модар дар Театри давлатии мусиқии тамошобини ҷавон ба номи Одилҷон Назаров баргузор гардид.

Чорабинии мазкур бо мақсади баланд бардоштани худшиносиву худогоҳии ҷавонон ва ҳамчунин дар замири онҳо бедор кардани ҳисси ватандӯстию меҳанпарастӣ ва дарёфт намудани соҳибистеъдодҳо доир шуда, дар он 14 нафар ҷавондухтарони шаҳру ноҳияҳои вилоят ҳунару истеъдоди хешро намоиш доданд.

Дар натиҷа Бобоҷонова Дилноза аз шаҳри Конибодом сазовори ҷойи якум, Алибоева Дурдона аз ноҳияи Деваштич сазовори ҷойи дуюм ва Мирдадоева Фарангис аз ноҳияи Истаравшан сазовори ҷойи сеюм гардида, бо диплом, ифтихорнома ва туҳфаҳои хотиравӣ сарфароз гардонида шуданд.