Дирӯз – 3 март дар доираи Фестивали байналмилалии ҷавонон, ки дар минтақаи “Сириус” (Парки олимпӣ) -и шаҳри Сочии Федератсияи Русия аз 1 март ҷараён дорад, намоиши ҳунарҳои мардумии иштирокчиёни фестивал баргузор гардид.

Дар намоишгоҳ ҳунарҳои мардумии Тоҷикистон низ дар қатори ҳунару анъаноти зиёда аз 180 давлати дунё ба намоиш гузошта шуд.

Дар ин намоишгоҳ ҳунарҳои атласу адрасбофӣ, заргарӣ, чӯбтарошӣ, гулдӯзӣ, кулолгарӣ, муҳрабофӣ, зардӯзӣ, рассомӣ ва амсоли ин намоиш дода шудааст.

Тавре иштирокчиёни Фестивал дар суҳбат бо мо иброз доштанд, ҷавонони мамлакатҳои гуногун зимни тамошо аз гӯшаи ҳунарҳои мардумии Тоҷикистон ба ҳунару анъанаҳои мардуми тоҷик баҳои баланд доданд.

Тавре аз аксу навор ва барномаҳои телевизионии шабакаҳои русӣ бармеояд, ҷавонони тоҷик дар ин Фестивал кишвари моро ба таври шоиста муаррифӣ карда истодаанд.

Ёдовар мешавем, ки дар Фестивали байналмилалии ҷавонон аз Тоҷикистон 275 нафар мутахассисони ҷавони соҳаҳои гуногун, кормандони вазорату идораҳо, дипломатҳо, соҳибкорон, ходимони илму маориф, варзишгарон, масъулини мақомоти маҳаллӣ, намояндагони ВАО, волонтёрон ва намояндагони ҷавони дигар қишрҳои фаъоли ҷамъиятӣ аз 18 то 35-сола иштирок карда истодаанд.

Ин Фестивал бузургтарин чорабинии ин қишри ояндасоз дар ҷаҳон ба шумор меравад, ки бо фармони Владимир Путин Президенти Федератсияи Русия аз 1 то 7 март баргузор мешавад.
Ба гуфтаи масъулини чорабинӣ ин ҳамоиши ҷавонон, муколама ва ҷустуҷӯи ҳамдигарфаҳмӣ, сарфи назар аз миллатҳо, ақидаҳои сиёсӣ ва хусусиятҳои фарҳангӣ мебошад.

"Ҷавонони Тоҷикистон"