Фотима Назаралиева аз зумраи ҷавонони соҳибистеъдод аст, ки бо ҳунари волояш дар байни ҳаводорони санъат маҳбубият пайдо намудааст. Ӯ дар деҳаи Миёншаҳри Ҷамоати деҳоти Ванқалъаи ноҳияи Шуғнон ба дунё омадааст. Фотима чун дар оилаи санъаткор таваллуд шудааст, суруду мусиқӣ ҳамеша дар хонаи онҳо танинандоз буд ва ба ҳамин минвол шавқу ҳаваси ин касб дар қалбаш ҷойгузин гашт.

Фотима дар оила хурдтарин фарзанд буда, падараш дар хондани суруд ба ӯ диққати бештар медод. Аз падараш илми мусиқӣ ва нозукиҳои онро меомӯхт.

Аз синфи 6-ум сар карда, Фотима дар озмуни “Ғунчаҳои санъат” ва маҳфилҳои гуногун ҳунарнамоӣ мекарду бо овози дилнишин ва марғуби хеш дар даври ҷамоатӣ ва ноҳиявӣ дили доварон ва бинандагонро тасхир мекард. Вақте ки дар синфи 9 - ум мехонд, бо ҳамроҳии падар ва апааш дар хонаи худ ансамбли оилавиро ташкил карда, дар маъракаҳои мардумӣ иштирок мекарданд.

Фотима аз духтарони фаъол, маҳфилоро ва гули сари сабади ҳама маҳфилу ҳамоишҳо буд. Вай пайваста меомӯхт ва дар роҳи интихобкардааш устувор буд. Ин чеҳраи нави санъат бо овози ширину худододаш дар муддати кутоҳ ба дили тамошобинони берун аз деҳоту ноҳия роҳ ёфт.

Аввалин бор Фотима дар Фес-тивали байналмилалии фарҳанг ва туризми “Боми Ҷаҳон”, ки соли 2018 дар шаҳри Хоруғ баргузор гардида буд, иштирок кард. Дар ин озмун санъаткорон аз мамлакатҳои хориҷа иштирок намуданд. Фотима низ дар ин чорабинии бонуфуз баромад карда, соҳиби диплом гардид. Баъд аз ин, соли 2019 ансамбли оилавиашон дар озмуни ҷамоатӣ иштирок намуда, роҳхат ба озмуни ноҳиявӣ гирифт. Дар ин давр бомуваффақият иштирок карда. бо ҳунару истеъдоди худ роҳхат ба озмуни вилоятӣ гирифт. Дар даври вилоятии озмун низ маҳорати баланди касбӣ нишон дода, роҳхат ба даври ҷумҳуриявии озмун таҳти унвони “Дунёи саодат” гирифт.

Дар ин озмун бо ифтихорнома ва диплом сарфароз гардид ва бо дастгирии собиқ раиси Вилояти Мухтори Кӯҳистони Бадахшон Шодихон Ҷамшед соли 2021 барои таҳсил ба Консерваторияи миллии Тоҷикистон ба номи Талабхуҷа Сатторов фиристода шуд. Дар ин боргоҳи маърифат тамоми нозукиҳои санъатро аз бар карда, бештар барои сайқал додани ҳунари худ саъю кӯшиш мекард ва бо меҳнату заҳмати хеш обрӯю эътибори зиёд пайдо кард.

Фотима дар ҳама жанрҳо - фалак, анъанавӣ, эстрадӣ, шашмақом, жанри академикӣ ва ғайра хуб месарояд. Сурудҳои ӯ “Модар”, “Ҷудо шудӣ” ва “Ватан” дар байни шунавандагон маъруфият пайдо кардаанд. Соли 2022 дар озмуни ҷумҳуриявии “Тоҷикистон - Ватани азизи ман” дар ноҳияи Шоҳмансури шаҳри Душанбе аз рӯи номинатсияи “сарояндагӣ” бо раҳнамоии устодон иштирок карда, сазовори диплом гардид. Худи ҳамон сол дар озмуни “Иҷрокунандаи беҳтарин 2022” дар бахши сарояндагии анъанавӣ (жанри фалак) сазовори ҷойи якум шуд. Инчунин, соли 2022 дар номинатсияи “сарояндагӣ” сазовори Шоҳҷоиза ва барандаи озмуни ҷумҳуриявии “Тоҷикистон - Ватани азизи ман” гардида, бо диплом ва 50 000 сомонӣ қадрдонӣ шудааст.

“Ман аз дастгириҳои падаронаи Пешвои миллат муҳтарам Эмомалӣ Раҳмон сипосгузорам. Чун пайваста барои мо-ҷавонон шароитҳои лозимаро муҳайё мекунанд ва ҳамеша дастгири мо,ҷавонон мебошанд”, - мегӯяд ӯ.

Вақте аз сафарҳои хориҷияш пурсон шудем, гуфт: “Сафари нахустину хотирмонам, ки дар кишвари Озарбойҷон ба вуқӯъ пайваста буд, бароям хеле писанд омад, чун моро хеле хуб пешвоз гирифтанд ва аз меҳмоннавозии гарму самимии онҳо шоду масрур гаштам”.

Ӯ бо ҳамроҳии санъаткорони маъруфи тоҷик, аз ҷумла, Нигина Амонқуллова, Нозияи Кароматулло ва дигар санъаткорони ҷавон дар муддати 12 рӯз дар ин кишвар ҳунар ва истеъдоди худро нишон додааст.

“Чун мо санъату ҳунари миллии худро нишон медодем, моро хуш мепазируфтанд”, - гуфт бо ифтихор Фотима.
Фотима айни ҳол дар Федератсияи Русия қарор дорад. Зимни суҳбат қайд кард, ки ба наздикӣ ба ватан баргашта, мехоҳад дастовардҳои хешро дар ҷодаи ҳунари сарояндагиву ромишгарӣ хубтару беҳтар намояд.

Мо низ барояш муваффақият хоҳонем.

Малика МУҚАДАМОВА, “ҶТ”