1-уми октябри соли равон дар маркази ноҳияи Айнӣ барои сафарбаркунии 60 нафар наваскарони ихтиёрӣ ба сафи Артиши миллӣ роҳбарияти ноҳия ва даҳҳо падару модар ҷамъ омада, сарбозони ихтиёриро бо дуои нек ба хизмати Модар-Ватан равон карданд.

Дар чорабинии мазкур раиси ноҳияи Айнӣ Муқим Муродзода, намояндагони сохторҳои қудратӣ, раисони ҷамоатҳои шаҳраку деҳот, роҳбарони ташкилоту муассисаҳо, фаъолон ва дигар сокинони ноҳия ширкат варзиданд.

Муқим Муродзода, раиси ноҳияи Айнӣ ҳамаи даъватшудаҳоро ба сафи Қувваҳои Мусаллаҳи Ҷумҳурии Тоҷикистон табрик намуда, иброз дошт: “Сафарбар кардани ҷавонони ихтиёрӣ ба хизмати ҳарбӣ амали ватандӯстона аст. Ҳеҷ гоҳ набояд фаромӯш кард, ки заминаи таъмини асосии бехатарӣ ва амнияти давлат ҳимояи марзу бум ва сулҳу суботи кишвар дар ҳама давру замон артиш буд ва то абад мемонад. Танҳо ҷавонони бо ору номус, шуҷоъ ва ватандӯст метавонанд, ки ҳар як порчаи ватанро ҳифз кунанд ва мардонавор сазовори номи сарбоз бошанд”.

Дар рафти чорабинӣ модари даъватшаванда аз деҳаи Гузари Боди Ҷамоати деҳоти Рарз Моҳзода Усмонова суханронӣ намуда, гуфт: "Ман ҳамчун модар фарзанди худро ба сафи Қувваҳои Мусаллаҳи Ҷумҳурии Тоҷикистон равон карда, мехоҳам, ки ӯ дар ҳифзу нигаҳдошти сулҳу суботи давлатамон саҳм гузорад. Бигузор ҳар як ҷавон қарзи фарзандии модари худро иҷро кунад. Ба ин ҷавонони шуҷои Ватан роҳи сафед орзумандам".

Чун анъана зимни гусели наваскарон маросими нонгазонии модарону гулдухтарон ба ҷавонони навдаъватшуда баргузор карда шуд. Модарон ҳангоми нонгазонӣ даст ба дуо бардошта, хостори сиҳативу саломатӣ ва сарбаландона хизмат кардани фарзандонро намуданд.

Дар охир ба наваскарон ҳуҷҷати ронандагӣ тақдим карда шуда, аз ҷониби бахши фарҳанги ноҳия барномаи консертӣ манзури ҳозирин шуд.