Тоҷикистон сол то сол бо азму иродаи қавӣ ва ҷаҳду талошҳои бесобиқаи роҳбарияти олии мамлакат рӯ ба рушд ниҳода, дар тамоми соҳаҳои хоҷагии халқи мамлакат дастовард, навгонӣ, пешрафт ва рушду инкишофи ҳамешагӣ ба чашм мерасанд. Ин ҳамаро фаъолони ҷомеаи шаҳрвандӣ натиҷаи истиқлолияти комили давлатӣ ва сулҳу суботи сартосарӣ маънидод менамоянд.

Дар раванди ин ҳама корҳои ободониву созандагӣ, сарсабзу хуррам гардонидани кишвар ва муҳимтар аз ҳама дар рушду таҳкими арзишҳои миллию давлатдорӣ баробари дигар қишрҳои ҷомеа ҷавонони мамлакат низ саҳмгузор буда, ин қишри фаъоли ҷомеа беш аз пеш бо ҷаҳду талош ва дастовардҳои хеш нақши боризи худро дар пешрафту тараққиёти кишвар гузошта истодаанд.

Имрӯз дар тамоми соҳаҳо фаъолии ҷавонони кордону соҳибтаҷриба баръало ба чашм расида, онҳо ҳар як дастуру супоришҳои Роҳбари давлатро сармашқи кори худ қарор дода, талош намуда истодаанд, то ба боварии роҳбарияти олии мамлакат сазовор бошанду чун ояндагони миллат фаъолияти назаррас дошта бошанд.

Ҳамасола ироа гардидани Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ барои ҳар як ҷавони кишвар воқеаи фараҳбахш асту дастури тозаи кору фаъолият. Зеро дар он тамоми масъалаҳои мубрам мавриди баррасӣ қарор гирифта, ҷиҳати рафъи мушкилиҳо ва расидан ба натиҷаҳои назарраси иқтисодию иҷтимоӣ, фарҳангию сиёсӣ ва илмӣ дар оянда дастуру супоришҳои махсус дода мешавад.

Паёми имсолаи Пешвои миллат низ барои ҷавонон дорои аҳамияти махсус буд. Зеро дар он барои сазовор таҷлил намудани 30 – солагии Истиқлолияти давлатӣ, ки яке аз ҷашнҳои муҳими давлатӣ ба ҳисоб меравад, аз ҷониби Сарвари даъват ба амал оварда шуд, то тамоми аҳолии кишвар, аз хурд то бузург ҷиҳати дар сатҳи баланд таҷлил намудани он аз имрӯз сар карда, камари ҳиммат банданд.

Пешвои миллат муҳтарам Эмомалӣ Раҳмон дар ҷараёни ироаи Паёми имсолаи хеш аз саҳми ҷавонон дар рушди кишвар ёдовар шуданд, ки ин худ аз боварӣ доштани Роҳбари давлат ба ояндагони кишвар мебошад. Аз ҷумла, Президенти кишвар зимни Паём иброз доштанд: “Мо иштироки фаъолонаи ҷавонони мамлакатро дар сохтмони неругоҳу корхонаҳои азими кишвар, аз ҷумла неругоҳи барқи обии “Роғун” ва корҳои бунёдкориву созандагӣ баръало мушоҳида менамоем. Сафи ҷавонон дар соҳаҳои дигар, аз ҷумла саноату сохтмон, маорифу тандурустӣ ва кишоварзӣ низ торафт афзоиш ёфта истодааст. Саҳми ҷавонон, дар ҳифзи Модар - Ватан шоистаи таҳсин буда, онҳо дар тамоми ҷузъу томҳои Қувваҳои Мусаллаҳ ва дигар сохторҳои ҳарбӣ содиқона хизмат мекунанд ва дар ҳимояи сарҳади давлатӣ низ нақши бузург мебозанд. Имрӯзҳо беш аз 257 ҳазор нафар ҷавон, ки 30 фоизи онҳоро духтарон ташкил медиҳад, дар муассисаҳои таҳсилоти олии касбии дохил ва хориҷи кишвар ба таҳсил фаро гирифта шудаанд”.

Дар идомаи Паём бо қаноатмандӣ таъкид гардид, ки ҷавонони мо давомдиҳандагони кору фаъолияти насли калонсол, неруи тавоно ва иқтидори воқеии пешрафти ҷомеа, хулоса, ояндаи давлат буда, фароҳам овардани шароити мусоид барои фаъолияти онҳо минбаъд низ ҳамчун яке аз масъалаҳои муҳимтарини сиёсати Ҳукумат боқӣ мемонад. “Насли ҷавони кишвари мо бо дарки масъулияти баланд, иродаи мустаҳкам, садоқату муҳаббати ватандорӣ, эътиқод ба арзишу муқаддасоти миллӣ ва ақлу заковати худ исбот намуд, ки роҳи интихобкардаи мо дар масири ватансозиву ватандорӣ дуруст мебошад,” - афзуданд Президенти кишвар муҳтарам Эмомалӣ Раҳмон.

Воқеан, ҳамин гуна боварӣ ва эътимод ба насли ҷавон аст, ки имрӯз онҳо дар тамоми соҳаҳо аз худ маҳорату малака нишон дода, бо донишу хиради хеш ба дастовардҳои гуногуни илмию эҷодӣ ва варзишӣ ноил гардида истодаанд. Ҳар сол мо борҳо шоҳид мегардем, ки ҷавонони бонангу номуси мо бо дастгирии Ҳукумати кишвар дар мусобиқаҳои гуногуни байналмилалии илмию фаннӣ ва варзишӣ иштирок намуда, дар натиҷа миёни дигар кишварҳо Парчами меҳанро баланд мебардоранд, ки ин боиси ифтихори ҳар яки мост.

Ғамхорӣ ва таваҷҷуҳи пайваста ба насли наврасу ҷавон аз ибтидои солҳои истиқлолият эҳсос гардида, солҳои охир он бештар шуда истодааст. Далели ин гуфтаҳо дар соли 2019 ба маблағи 500 миллион сомонӣ сохта ба истифода додани 130 муассисаи таҳсилоти умумӣ бо зиёда аз 32 ҳазор ҷойи нишаст мебошад. Соли 2020 сохтмони 181 муассисаи таҳсилоти умумӣ дар ҳаҷми 900 миллион сомонӣ бо муҳайё намудани 54 ҳазор ҷойи нишаст пешбинӣ шудааст. Гуфта мешавад, то ҷашни 30 - солагии истиқлолияти давлатӣ 128 муассисаи томактабӣ ва 338 муассисаи таҳсилоти умумӣ бунёд гардида, дар маҷмӯъ, 1332 муассисаи таълимӣ ва томактабӣ тармиму таҷдид карда мешавад.

Сохта шудани ин ҳама муассисаҳои таълимӣ баҳри он аст, то наврасону ҷавонон илму дониш омӯзанду соҳибкасб шаванд ва чун ояндагони ин миллату давлат саҳмгузори рушди меҳан бошанд.

Президенти кишвар муҳта-рам Эмомалӣ Раҳмон дар Паём барои таҳкими заминаҳои меъёрии ҳуқуқии соҳа ва ҳифзи минбаъдаи манфиатҳои ҷавонон сохтору мақомоти марбутаро вазифадор намуданд, ки Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, “Стратегияи сиёсати давлатии ҷавонон то соли 2030”- ро дар таҳрири нав таҳия ва ба Ҳукумати мамлакат манзур намоянд. Инчунин вобаста ба масъалаи ҷавонон таъкид гардид, ки дар рӯҳияи ҳисси баланди миллӣ, садоқат ба давлату миллат, таҳаммулгароӣ, ватандӯстиву хештаншиносӣ ва пос доштани арзишҳои миллӣ тарбия намудани ҷавонон вазифаи муҳимтарини ҳамаи сохтору мақомот ва аҳли ҷомеа мебошад.

Дар воқеъ, ҷавонон неруи созандаи имрӯзу фардои Ватан буда, ҷиҳати соҳибдониш гардидан ва дар рӯҳияи ватандӯстиву хештаншиносӣ ба камол расидани онҳо тамоми шароитҳои зарурӣ фароҳам гардидааст. Пас, рисолати имрӯзаи ҳар як ҷавони худогоҳу бо нангу номус ин аст, то аз имкониятҳои мавҷудбуда, самаранок истифода намояд, илму дониш омӯзад ва ҳамеша талошварз дар рушду тараққиёти ватани азизамон бошад.