Нимаи дуюми рӯзи 11 феврал дар толори маҷлисгоҳи Кумитаи миллии олимпии Тоҷикистон мулоқоти раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳмонзода Абдулло Қурбоналӣ бо таҳсилкунандагони курси омӯзишии “Пайравони Пешвои миллат” баргузор гардид.

Дар доираи мулоқот нахуст дарси курси омӯзишии “Пайравони Пешвои миллат” аз ҷониби раиси Кумитаи кор бо ҷавонон ва варзиш гузаронида шуд.

“Аз рӯзҳои ба сари қудрат омадани Пешвои муаззами миллат муҳтарам Эмомалӣ Раҳмон нисбати насли наврас ва ҷавонон ғамхориҳои ҳамешагӣ ба назар мерасанд. Пас, ҳамаи мо вазифадорем, ки аз таҷрибаи бузурги созандагиву бунёдкорӣ ва сиёсати ҷавонпарваронаи Пешвои муаззами миллатро хуб биомӯзем ва дар ободкориҳои кишвари худ саҳмгузор бошем. Инчунин дар чорабиниҳои сиёсиву фарҳангӣ аъзоёни маҳфили "Пайравони Пешвои миллат" фаъолона иштирок намоем”, - таъкид намуд, Раҳмонзода Абдулло Қурбоналӣ.

Гуфта шуд, ки курси мазкур се моҳ идома ёфта, дар он роҳбарони вазорату идораҳо, собиқадорони соҳаи хизмати давлатӣ ва шахсиятҳои бонуфузи ҷомеа дар доираи фаҳмиши худ ба ҷавонон дар муддати ду соат дарс мегузаранд.

Курси омӯзишии “Пайравони Пешвои миллат” соли сеюм аст, ки аз ҷониби Кумитаи кор бо ҷавонон ва варзиш дар доираи ғамхориҳои Пешвои муаззами миллат гузаронида шуда, дар он шумораи зиёди ҷавонони фаъол таҳсил мекунанд.