ҶАВОНОН
Якшанбе 28 Ноябр 2021 06:48
8342
Сарвари давлат дар Паёми соли гузаштаи худ ба Маҷлиси Олӣ солҳои 2020 – 2040-ро “Солҳои омӯзиш ва рушди фанҳои риёзӣ, дақиқ ва табиӣ дар соҳаи илму маориф” эълон намуданд. Илова бар ин, аз ҷониби Президенти кишвар ба хотири боз ҳам бештар ба омӯзиши илмҳои риёзиву дақиқ ва табиӣ ҷалб кардани наврасону ҷавонон, олимону муҳаққиқон озмуни ҷумҳуриявӣ зери унвони “Илм – фурӯғи маърифат” эълон гардид.

Пас аз эълон гардидани озмуни мазкур дар кишвар чеҳраҳои нави ихтироъкорон пайдо гардиданд, ки яке аз онҳо Дилшодҷон Ойматов ба ҳисоб меравад.

Ӯ наврасест, ки бо ихтирои трактори хурди худ дар даври вилоятии озмуни ҷумҳуриявии “Илм - фурӯғи маърифат” дар номинатсияи “Ихтироъкорӣ ва навоварӣ” ҳамагонро дар ҳайрат гузошт. Ҳайати ҳакамон ба кори Дилшод баҳои баланд дода, ӯро дар миёни 300 нафар хонандагони шаҳру ноҳияҳои вилояти Суғд ғолиб эълон карданд.

Дилшод хонандаи синфи 8 буда, аз хурдӣ ба фанҳои дақиқ шавқу рағбати зиёд дошт. Ба гуфтаи пайвандонаш ӯ навраси зираку доно буда, аллакай аз 6-солагӣ ба сохтани мошинча ва дучарха шурӯъ намудааст. Дар мактаб ҳам бо баҳои хубу аъло таҳсил намуда, дар чорабиниҳо фаъолияти хуб нишон медод. Ӯ имрӯз соҳиби даҳҳо ифтихорномаю сипоснома аст.
“Вақте истеъдоди писарамро пай бурдам, тасмим гирифтам, ӯро ба Муассисаи таҳсилоти иловагии №1 - и шаҳри Панҷакент ба маҳфили “Автомодел” барои омӯзиши нозукиҳои техника супорам, то дар оянда мутахассиси хуб шавад. Айни ҳол фарзандам дар он ҷо таҳсил карда истодааст”,- мегӯяд падари Дилшод.

Ӯ, ки дар оилаи деҳқон ба воя расидааст, барои осон намудани кори мардуми заҳматкаш дар саҳро тасмим мегирад, трактори ҳамакораро ихтироъ намояд.
- Дилшодҷон трактори ҳамакораро барои мардуми меҳнаткаши кишвар сохтааст. Ӯ муддати як сол ин тракторро ихтироъ кард. Меҳнати ӯ, на фақат мо наздикон, балки тамоми сокинони шаҳри Панҷакентро хушҳол кард”, - гуфт Одил Ойматов, падари Дилшод.

Дилшод трактори хурди ҳамакораи худро “Суғд” номгузорӣ намудааст, ки дар он 14 намуд қисмҳои насбкунанда мавҷуд аст. Гуфта мешавад, ки ҳар яке аз ин қисмҳо дар алоҳидагӣ дар вақти зарурӣ насб мешаванд, ки барои иҷрои корҳои гуногун истифода хощанд шуд. Он қувваи бардошти то 500 кг вазнро дорад.

Ихтироъкори наврас дар ихтирои худ кӯшиш намудааст, харҷи ками сӯзишвориро ба назар гирад. Айни замон ихтироъкор назди худ мақсад гузоштааст, дар оянда шумораи чунин тракторҳоро зиёд намояд, то кори деҳқонон дар саҳро осон гардад.

Ӯ барои боз ҳам таҷрибаи зиёд гирифтан, пайваста китоб мехонаду меомӯзад. Дар вақтҳои холигии худ дар шабакаҳои интернетӣ наворҳои ихтироъкорони машҳури дунёро тамошо мекунад, то ки барои худ ягон чизи навро пайдо кунад.


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Ноябр 2021 c.