Масъулини Муассисаи давлатии “Маркази ҷавонон” – и ВМКБ барои кормандони мақомоти иҷроияи маҳаллии ҳокимияти давлатии вилоят, омӯзгорону донишҷӯёни Донишгоҳи давлатии Хоруғ ба номи Моёншо Назаршоев ва намояндагони ВАО дар мавзӯи “Тоҷикистон – кишвари кашфношуда” конфронси омӯзишӣ доир намуданд.

Муовини директори муассиса Дидоршоҳ Насриддинов гуфт, ки имсол “Соли руши сайёҳӣ ва ҳунарҳои мардумӣ” аст ва он дар пешрафти иқтисодиву иҷтимоии кишвар заминаи махсус хоҳад гузошт:

- Кишвари мо воқеан таърихи бой ва имкониятҳои бузурги сайёҳӣ дорад ва агар ҳамаи онҳо мувофиқи маром мавриди корбурд қарор гиранд, таваҷҷуҳи ҷомеаи ҷаҳонӣ ба Тоҷикистон боз ҳам бештар хоҳад шуд, - гуфт ӯ.

Дар конфронс ҳамчунин Акимбек Акимбеков, корманди Шуъбаи рушди сайёҳӣ дар вилоят, Силтонбегим Силмонова, мутахассиси соҳаи сайёҳӣ, Сураҷ Чоршанбиев, муовини сардори Раёсати кор бо ҷавонон ва варзиш, Малика Хоразмшоева, донишҷӯи Донишгоҳи Хоруғ оид ба соҳаи мазкур ва дурнамои рушди он, минтақаҳои сайёҳии кишвар, имкониятҳои соҳа ва татбиқи инфрасохтори он дар ҷумҳурӣ, монеаҳо дар рушди сайёҳӣ фикру андешаҳои хешро баён доштанд.