Дирӯз, 28 сентябр, дар МТМУ №101-и ноҳияи Синои шаҳри Душанбе миёни хонандагони синфҳои болоии муассисаҳои таҳсилоти миёнаи умумӣ, мактаб-интернатҳо, литсею гимназияҳои ноҳия дар мавзӯи “Ҷавонон бар зидди терроризм” озмуни иншои беҳтарин баргузор гардид.

Абдулло Давлатзода,мудири Бахши ҷавонон, варзиш ва сайёҳии ноҳияи Сино қайд кард, ки мақсад аз баргузор намудани озмуни мазкур рушди фаъолияти эҷодии хонандагон, дарёфти истеъдодҳои ҷавон, рушди босифати таҳсилот, тарбияи ватанпарастии ҷавонон ва ҳавасмандии моддию маънавии онҳо мебошад.

- Рисолати наврасону ҷавонон имрӯз пеш аз ҳама ҳифзи арзишҳои миллӣ, муқовимат бо андешаҳои тундгаро ва муқовимат ба терроризму экстремизм мебошад. Онҳо бояд дар рӯҳияи худшиносиву худогоҳӣ, ватандӯстиву ватанпарварӣ ва ифтихор аз созандагиву бунёдкорӣ тарбия ёбанд ва ҳамеша пайрави андешаҳои солиму солеҳ бошанд, - гуфт А. Давлатзода.

Дилбар Ҷӯраева, ҷонишини директор оид ба таълими МТМУ №101 дар баромадаш, аз ҷумла гуфт, дар замони бисёр мушкили вазъи ҷаҳон баргузории чунин озмунҳо ва ҳар гуна мулоқоту вохӯриҳо наврасону ҷавононро ба сӯи созандагӣ раҳсипор менамояд. Мо - насли калонсол, махсусан омӯзгорон бояд нисбат ба тақдири кӯдакону наврасон ва ҷавонон бетараф набошем ва дар ҳама ҳолат онҳоро ба роҳи дурусту созанда ҳидоят намоем. Ӯ таъкид дошт, ки наврасону ҷавонон омӯзиши илмро вазифаи аввалиндараҷаи худ донанд ва фирефтаи андешаҳои хоми ҳизбу ҳаракатҳои ифротӣ нашванд.



Баъд аз натиҷагирӣ ҷойи аввал насиби Дилноза Қурбонова, хонандаи синфи 10-и МТМУ №83 гардид. Ҷойи дуюмро Аниса Хайриддинова, хонандаи синфи 11-и МТМУ 92 ва Робиямоҳи Баҳром, хонандаи синфи 10-и МТМУ №101 ва ҷойи сеюмро Сиёвуши Фирӯз, хонандаи синфи 10-и МТМУ №54 ва Мастонаи Нурулло, хонандаи синфи 10-и МТМУ №82 ишғол намуданд.

Ба ғолибон ва 15 нафари дигар барои навиштани иншои беҳтарин “Сипоснома” ва тӯҳфаҳои хотиравии Бахши ҷавонон, варзиш ва сайёҳии ноҳияи И. Сино супорида шуд.