2 июни соли ҷорӣ дар шаҳри Ҳисор миёни ҷавонони синни даъватӣ ва ҷавононе, ки хизмати ҳарбиро адо намудаанд, мулоқоти рӯ ба рӯ доир шуд.

Дилошӯб Розиқов, мутахассиси пешбари Раёсати кор бо ҷавонони Кумитаи ҷавонон, варзиш ва сайёҳии назди Ҳукумати кишвар аз шароит ва буду боши хизматчиёни ҳарбии Қувваҳои Мусаллаҳи кишвар ёдовар шуда қайд намуд, ки “Бо дастгириҳои давлату Ҳукумат Қувваҳои Мусаллаҳи ҷумҳурӣ ба як мактаби мардонагӣ ва сохтори мукаммалёфтаи соҳаи ҳарбӣ табдил ёфтааст. Боиси хушнудист, ки рӯз аз рӯз сафи ихтиёриён ба хизмати ҳарбӣ меафзояд”.

Масъулини Кумита ба як қатор ҷавононе, ки хизмати ҳарбиро адо намудаанд ва онҳое, ки мехоҳанд ихтиёран ба сафи Қувваҳои Мусаллаҳ шомил шаванд, бо туҳфаҳои варзишӣ қадрдонӣ намуданд.

Ёдовар мешавем, ки ин мулоқот дар доираи Нақшаи чорабиниҳо Кумитаи ҷавонон, варзиш ва сайёҳии назди Ҳукумати ҷумҳурӣ бо мақсади баланд бардоштани ҳисси ватандӯстии ҷавонон сурат гирифтааст.