ҶАВОНОН
Ҷумъа 22 Январ 2021 07:04
7597
Тибқи фармонҳои ахири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар моҳи ноябри соли равон ба вазифаҳои роҳбарикунандаи як қатор сохторҳо кадрҳои ҷавону болаёқат таъин гардиданд.

Чуноне ки Маркази матбуотии Президенти кишвар иттилоъ медиҳад: “Дар асоси Фармонҳои Президенти Ҷумҳурии Тоҷикистон ва Қарорҳои Ҳукумати Ҷумҳурии Тоҷикистон имрӯз ба вазифаҳои роҳбарикунандаи Бонки миллии Тоҷикистон, корхонаи воҳиди давлатии бонки саноативу содиротии Тоҷикистон “Саноатсодиротбонк” ва сохторҳои дигар таъингардида, аксарият кадрҳои ҷавону болаёқат буда, дар баробари таҷрибаи корӣ, маҳорати кордонӣ, қобилияти ташкилотчигӣ ва малакаи роҳбарӣ, донандаи забонҳои хориҷӣ мебошанд”.

Дар гузашта низ Президенти кишвар муҳтарам Эмомалӣ Раҳмон дар ҷараёни мулоқотҳояш бо сокинони кишвар борҳо ҷавонони фаъолу рӯшанфикр ва болаёқатро аз миёни издиҳоми мардум шинохта, дар шурӯи карйераи онҳо дар ҳукумат сабаб гардидааст.

Дар воқеъ, мо имрӯз шоҳиди он гардида истодаем, ки ҳамасола шумораи ҷавонони роҳбарикунанда дар кишвар меафзояд ва ибораи “Ояндаи давлат дар дасти ҷавонон аст” ба воқеият табдил меёбад. Чун вақте кадрҳои ҷавону лаёқатманд сари мансаб меоянду бо донишу малакаи хеш номбардори миллату давлатанд, кишварро ояндаи рӯшане интизор аст.
Ба вазифаҳои роҳбарикунанда таъин гардидани кадрҳои ҷавону лаёқатмандро коршиносон яке аз иқдомоти хуби Президенти кишвар арзёбӣ мекунанд.

Ба гуфтаи Илҳомҷон Ҳамидиён, мудири шуъбаи таблиғот ва ташвиқоти КИМ ҲХДТ кадрҳои ҷавон захираи пуриқтидор ва муътамадеро мемонанд, ки месазад ба онҳо сармоягузорӣ намуд, зеро ин эътимоду сармоя ҳатман дар шакли хизмати содиқона ба Ватан ва миллат бозпас мегардад.

“Тавре шоҳид мешавем, Ҳукумати мамлакат ба роҳандозии Консепсияи “Рӯй овардан ба ҷавонон” бо мақсади дастгирии ҳамаҷонибаи насли ҷавону ояндасози кишвар авлавият медиҳад, ки аз таъкидҳои ҳамешагии Пешвои муаззами миллат бармеоянд. Иқдоми мазкур омили муҳими ҷалби ҳарчи бештари ҷавонон ба умури идораи давлат ва баланд бардоштани нуфузу эътибори онҳо дар ҷомеа ба шумор меравад. Ин ишора (жест)-и боварӣ ва эътимоди Президенти мардумии кишвар нисбат ба ҷавонон бояд аз нуктаи назари кадрпарварӣ, давлатмеҳварӣ ва касбият шинохта шавад. Яъне имрӯз Ҳукумати Тоҷикистон бо муҳтавои сифатан нав мукаммал сохтани механизми кор бо ҷавононро амалӣ мекунад. Моро зарур аст, уҳдадориҳои шаҳрвандии худро бештар дониста, қонунҳои ҷумҳуриро риоя намоем ва маърифати ҳуқуқиамонро такмил диҳем. Имрӯз фурсатест, ки ҷавонон ба иҷрои бошууронаи қонунҳо саъй намуда, иштироки фаъолонаашонро ҷиҳати ҳифзи қонунҳои ҷумҳурӣ эҳсос намоянд”,-мегӯяд ҳамсуҳбати мо.

Ҳамзамон ба гуфтаи Илҳомҷон Ҳамидиён ҳоло дар миёни ҷавонон шахсиятҳое ба камол расида истодаанд, ки онҳо бо кору таҳсил ва одоби шоистаашон намуна буда, дар вуҷудашон хислатҳои волои иқдому ташаббускорӣ мушоҳида мегардад. Дар заминаи зарурати такмили ин асолати онҳо ва дастгирию ҳавасманд гардонидани ин қишри бунёдкор Пешвои муаззами миллат ба вазифаҳои роҳбарикунанда кадрҳои ҷавон ва занони донишмандро бештар пешбарӣ ва дастгирӣ намуда истодаанд.

Дар Ҷумҳурии Тоҷикистон кам нестанд кадрҳои ҷавоне, ки ба дигар ҷавонон намуна ва сазовори боварӣ бошанд ва бояд дигарон аз онҳо ибрат гиранд.

Ба гуфтаи ӯ, кадрҳои ҷавони имрӯза бо шабакаҳои иҷтимоӣ , махсусан Фейсбук ва Инстаграм фаъолона кор мекунанд, ба маводи муғризонаи бадхоҳон вокуниш менамоянд, бо шароити воқеии муҳоҷирони меҳнатӣ огоҳӣ дошта, ҷалби онҳоро ба идораи механизми давлатӣ тақвият медиҳанд.

Вале дар баробари ин кадрҳои ҷавони роҳбарикунанда бояд чӣ корҳоеро ба сомон расонанд? Чӣ бартариятҳоро бояд доро бошанд ва бо мансаб чӣ гуна рафтор кунанд?

Ба гуфтаи Шӯҳрат Саидов, раиси шӯрои олимони ҷавони вилояти Суғд ҷавонон неруи бузурге ҳастанд, ки аз зиндагӣ бисёр чизҳоро интизоранд ва вақте онҳо дар вазифаҳои роҳбарикунанда фаъолият мекунанд, кӯшиш ба харҷ медиҳанд, ки дар ҳамон соҳа пешравӣ ва дигаргунӣ ба миён ояд.

- Бояд ҷавонони дар кадрҳои роҳбарикунанда қарордошта, кӯшиш намоянд, бо тамоми неруи хеш корро пеш баранд, бо идеяҳои наву созанда ва барои пешрафти ҷомеа муфид амал намоянд, ҳамкориро бо мардум зиёд намуда, дар пешрафти кор аз таклифу пешниҳодҳои созандаи онҳо истифода намоянд, пайваста дониши худро такмил диҳанд, обрӯву эътибори худро ҳифз карда, бо рафтору кирдор барои дигарон намунаи ибрат бошанд, ба вазифа ба як чизи доимӣ муносибат накунанд ва тавре фаъолият кунанд, ки роҳбарии онҳо сабаби пешрафти соҳа ва беҳтар гардидани вазъи зиндагии мардум гардад,-гуфт, Ш. Саидов.

Хулоса, ба гуфтаи коршиносон дар шароити муосир кадрҳои ҷавон аз механизмҳои психологии иҷтимоӣ кор мегиранд, дар баромадҳои онҳо мантиқи суханронӣ риоя мешавад. Арҷгузорӣ ба арзишҳои фарҳангии миллат баръало эҳсос мешавад. Ва бисёр ҳам хушоянд аст, ки кадрхои ҷавон масъулияти шаҳрвандиро тақвият бахшида, ба хизмати иҷтимоӣ бартарӣ медиҳанд. Ин раванд бояд муттасил идома ёфта, ҷиҳати шаклгирии идеяи асосӣ – пойдории истиқлолияту ваҳдат муосидат намояд.


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Январ 2021 c.