Бо ибтикори Раёсати кор бо занон ва оилаи вилояти Хатлон ба муносибати 20-умин солгарди Рӯзи Ваҳдати миллӣ ва “Соли ҷавонон”, Фестивал-озмуни вилоятии “Алла – ифшогари орзуҳои модар” баргузор гардид.

Дар ин фестивал-озмун, ки дар толори Донишкадаи энергетики Тоҷикистон воқеъ дар ноҳияи Бохтар баргузор гардид, бонувони алласаро аз кулли шаҳру ноҳияҳои вилоят ширкат варзиданд, ки аксари онҳоро ҷавондухтарон ташкил медоданд.
  
Ба гуфтаи Раъно Раҳимзода, сардори Раёсати кор бо занон ва оилаи вилоят, мақсади чорабинӣ омода намудани модарони ҷавон ва ба онҳо омӯзонидани нигоҳубини кӯдак, инчунин ҳифзи суннатҳои мардумӣ, ки бо садои ширини модар хобонидани тифл дар гаҳвора ва алласароӣ яке аз онҳост, иборат мебошад.
  
Дар аввал, иштирокдорон ҳунари худро дар парпеч кардани кӯдак нишон доданд. Шартҳои дигари озмуни мазкур маҳорати баланди алласароӣ, матни пурмаънои таронаи “Алла” ва пӯшидани либоси миллӣ буд.
  
Ҳамин тариқ шоҳҷоизаи фестивал-озмун насиби намояндаи ноҳияи Мир Сайид Алии Ҳамадонӣ Гулрӯ Сахиева гардид. Ҷои аввал ба Шамъигул Расулова аз ноҳияи Фархор, ҷои дуюм ба Хосиятмоҳи Маҳрам аз ноҳияи Данғара ва ҷои сеюм насиби Сабринаи Абдулло аз ноҳияи Ёвон гашт.

Ба иштироккунандагон ҷиҳати фаъол буданашон дар ин фестивал-озмун сипоснома ва туҳфаҳои таъсиснамудаи Раёсати кор бо занон ва оилаи вилояти Хатлон тақдим гардид.

 Умед Мирзоев, “ҶТ”