Дар шаҳри Хоруғ маросими қадрдонии ғолибони даври шаҳрии Озмуни ҷумҳуриявии “Илм - фурӯғи маърифат” баргузор гардид.

Зимни ифтитоҳи маросими қадрдонӣ раиси шаҳри Хоруғ Назарзода Ризо Шодӣ зикр кард, ки давлат ва Ҳукумати Ҷумҳурии Тоҷикистон таҳти роҳбарии Пешвои муаззами миллат муҳтарам Эмомалӣ Раҳмон ба рушди илму маориф таваҷҷуҳи махсус зоҳир намуда, барои фароҳам овардани шароити мусоид ҷиҳати таҳсил, таҳқиқоти илмӣ ва рушди қобилияти эҷодии ҷавонон тадбирҳои мушаххас амалӣ менамоянд.

Гуфта шуд, ки дар ҷаҳони муосир пешрафти ҳар як давлат пеш аз ҳама ба сатҳи дониш, рушди илм ва истифодаи технологияҳои навин вобастагӣ дорад. Аз ин рӯ, ҷавонон бояд барои аз худ намудани донишҳои муосир, омӯзиши илмҳои дақиқ, технологияҳои рақамӣ, барномасозӣ ва забонҳои хориҷӣ бештар кӯшиш намоянд. Имрӯз ҷавонони соҳибистеъдоди мо имкониятҳои васеъ барои таҳсил ва рушди қобилиятҳои худро доранд.

Раиси шаҳр инчунин ба омӯзгорон ва волидон барои саҳми арзандаашон дар тарбияи насли наврас ва омода намудани иштирокчиёни озмун изҳори сипос намуда, таъкид кард, ки дастовардҳои ҷавонон маҳсули ҳамкории муассисаҳои таълимӣ, омӯзгорон ва оила мебошад.

Дар фарҷом ғолибон ва фаъолони озмун бо Ифтихорнома ва мукофотпулӣ сарфароз гардонида шуданд.

Садоншо ҶАНОБИЛШОЕВ, “ҶТ”