Бо ибтикори Бахши кор бо ҷавонон ва варзиш, Шуъбаи кор бо занон ва оила дар маҳаллаҳои шаҳри Хоруғ таҳти унвони “Нест бод машруботи спиртӣ!”аксияи тарғиботӣ-ташвиқотӣ баргузор гардид, ки дар он беш аз 780 нафар ҷавонони фаъол ширкат варзиданд.

Ба гуфтаи Имомёрбек Имомёрбеков, мудири Бахши кор бо ҷавонон дар аксия намояндагони дигар сохторҳову идораҳои қудратӣ низ иштирок намуданд:

“Аксия ба мақсади коҳиш додани фурӯши машрубот, пешгирии истеъмоли он байни аҳолӣ, бахусус ҷавонон ва аз байн бурдани нашъамандиву нашъаҷалобӣ ташкил шуд. Феълан ғайр аз доиркунии аксия дар ҳамбастагӣ бо сохторҳои дахлдор дар мағозаву дӯконҳои шаҳр рейди муштарак гузарондем ва бо масъулини мағозахо мулоқоти судманд оростем”.

Чунин чорабиниҳои таблиғотӣ дар маҳаллаҳои “Хичордев”, “Сайфулло Абдуллоев”, “Селхозтехника”, “Хоруғи боло” ва “УПД” баргузор шуда, дар назар аст, ки дар дигар кӯчаҳои шаҳр ҳам доир карда шавад.

Машҳур ИМОМНАЗАРОВ, “ҶТ”