Дар Донишгоҳи давлатии Хоруғ ба номи Моёншо Назаршоев бо ибтикори Корхонаи воҳиди давлатии ҷумҳуриявии “Тоҷикагролизинг” дар ҳамкорӣ бо Мақомоти маҳаллии ҳокимияти давлатии ВМКБ озмуни “Ихтироъкор ва навоварони беҳтарин” ва намоиши маҳсулоти хоҷагидорӣ гузаронида шуд.

Дар он ректори донишгоҳ Шермамад Ҷонмамадов, муовинони ректор, роҳбари Корхонаи фаръии “Бадахшонагролизинг” Зокирҷон Қурбонҷонов ва дигар кормандони корхона аз маҳсулоти хоҷагидорию деҳқонӣ, технологияи инноватсионӣ, навовариҳои косибии шаҳру ноҳияҳои вилоят ва Донишгоҳи Осиёи Марказӣ дидан карда, аз дастранҷи ҳунармандону ихтироъкорони ВМКБ бархурдор шуданд.

Дар озмун мавзӯъҳои “Навоварӣ ва ихтироот дар донишгоҳи Хоруғ ба номи М.Назаршоев”, ”Истифодаи системаи геоинфарматсионӣ дар омӯзиши фарсоиши хок дар водии Вахони ноҳияи

Ишкошими ВМКБ”, “Ихтироъкорӣ дар соҳаи оҳангарӣ”, “Баланд бардоштани самаранокии парвариши маҳсулот дар шароити гармхонаҳо”, “Усулҳои беҳтар намудани ҳосилнокии дарахтони мевадиҳанда бо истифодаи технологияи инноватсионӣ” ва ғайра баррасӣ гаштанд.

Аз рӯи натиҷаҳои ҷамъбастии озмун ҷойи якумро Донишгоҳи давлатии Хоруғ соҳиб шуда, Донишгоҳи Осиёи Марказӣ ва ноҳияи Рӯшон бошанд зинаҳои дуюму сеюмро гирифтанд.

Ба ғолибон мукофоту ифтихорномаҳо дода шуд.