Дар театри вилоятии мусиқӣ-мазҳакавии ба номи Меҳрубон Назарови шаҳри Хоруғ ҳамоиши гирандагони стипендияи Президенти Ҷумҳурии Тоҷикистон ва ғолибони мусобиқаҳои варзишӣ таҳти унвони “Ҷавонон-пайравони Пешвои миллат” баргузор гардид.

Дар чорабинӣ раиси Вилояти Мухтори Кўҳистони Бадахшон Мирзонабот Алишер Худобердӣ, раиси шаҳри Хоруғ Назарзода Ризо Шодӣ, сардори Раёсати кор бо ҷавонони дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Амин Иброҳимзода иштирок намуданд.

Сараввал раиси вилоят Мирзонабот Алишер Худобердӣ барои доиркунии чорабинӣ ба ташаббускорон изҳори сипос намуда, зикр дошт, ки ниёгони миллати соҳибхиради тоҷик бо кашфиёти нодири худ тавонистанд, дар тамоми илмҳои дунявӣ саҳми бузург гузоранд.

- Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид кардаанд: “Мардуми тоҷик аз даврони бостон то ба имрўз баробари таҳкими дўстиву рафоқат ва сулҳу субот ба қадри илму дониш ва мактабу маориф низ мерасанд ва ба ин манбаи ташаккулдиҳандаи арзишҳои маънавии ҳаёти инсон арҷ мегузоранд.Тоҷикон ҳамчун миллати соҳибтамаддун дар ҳар давру замон омўхтани илму донишро аз шартҳои асосии рушди маънавиёти инсон медонистанд”.

-Яке аз механизмҳои ҳавасмандкунӣ ва дастгирии иҷтимоии ҷавонон ин таъсиси Стипендияи президентӣ барои хонандагон ва донишҷўёни пешқадаму фаъоли муассисаҳои таҳсилоти миёнаи умумӣ, касбӣ ва олӣ, ки соли 1998 муқаррар гардидааст, ба ҳисоб меравад, - гуфт, раиси ВМКБ. - Он солҳо дар миқёси вилоят ҳамагӣ 8 хонанда гирандаи Стипендияи президентӣ буданд, ки маблағи он 200 сомониро ташкил медод.

Таъкид шуд, ки маҳз бо дастгирии рўзафзуни роҳбарияти мамлакат ва тараққиёти иқтисодиёти кишвар теъдоди гирандагони стипендия ҳам дар сатҳи кишвар ва ҳам дар миқёси вилоят мунтазам зиёд гардида, дар соли 2017 шумораи хонандагони гирандаи Стипендияи президентӣ ба 21 нафар ва маблағи он ба 460 сомонӣ баробар шуд. Аз 1 сентябри соли 2021 теъдоди гирандагони Стипендияи президентӣ аз 400 ба 3000 нафар ва маблағи он ба 500 сомонӣ расонида шуд.
Дар шаҳру ноҳияҳои вилоят аз соли 2021 теъдоди гирандагони Стипендияи президентӣ ба 81 нафар расид, ки аз ин шумора 80 нафар хонандаи муассисаҳои таҳсилоти умумӣ ва 1 нафар донишҷўи Донишгоҳи давлатии шаҳри Хоруғ ба номи Моёншо Назаршоев мебошанд. Дар баробари ин, барои 10 нафар хонандаи муассисаҳои таълимӣ стипендияи раиси вилоят ба маблағи 100 сомонӣ ва 21 нафар стипендияи раисони шаҳру ноҳияҳо ба маблағи аз 150 то 200 сомонӣ муқаррар гардидааст.

Сардори Раёсати кор бо ҷавонони дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Амин Иброҳимзода дўстии ҷавонони минтақаҳои ҳудуди ҷумҳурӣ ва ҳувияти миллии онҳоро арзиши олии 30 соли Истиқлолияти давлатӣ унвон намуд.

Дар маросими супоридани Стипендияи президентӣ хонандагони муассисаҳои таълимӣ, донишҷўёни муассисаҳои ибтидоии касбӣ ва олии вилоят шаҳодатнома ва стипендияро дарёфт намуда, инчунин ба ғолибони 14 намуди бозиҳои варзишӣ, озмунҳои сатҳи ҷумҳуриявӣ ва вилоятӣ ва як зумра омўзгорону хонандагони муассисаҳои таълимӣ ифтихорнома, мукофотпулӣ ва туҳфаҳои арзишманд супурда шуд.

Дар фарҷом барномаи хотирмони фарҳангӣ аз тарафи аҳли фарҳанги вилоят пешкаши ҳозирин гашт.