24-уми декабр бо ташаббуси Кумитаи ҷавонон, варзиш ва сайёҳӣ ва Иттифоқи ҷавонони Тоҷикистон дар Донишгоҳи давлатии омӯзгории Тоҷикистон ва кӯчаву хиёбонҳои шаҳри Душанбе бо иштироки васеи ҷавонон Аксия таҳти уновни “Мо - ҷавонон аз ташаббуси Пешвои миллат ифтихор дорем!” доир гардид.

Аксияи мазкур ба хотири аз ҷониби Созмони Милали Муттаҳид пазируфта шудани ташаббуси Пешвои миллат, муҳтарам Эмомалӣ Раҳмон эълон гардидани “Даҳсолаи байналмилалии амал “Об барои рушди устувор, 2018-2028” доир гардид.



Аҳтам Абдуллозода, раиси Кумитаи ҷавонон, варзиш ва сайёҳӣ зимни суханронӣ дастгирӣ ёфтани ташаббуси Президенти кишвар, муҳтарам Эмомалӣ Раҳмон оид ба эълон намудани “Даҳсолаи байналмилалии амал “Об барои рушди устувор, 2018-2028”-ро аз ҷониби Созмони Милали Муттаҳид ба ҷавонону ҳамватанон муборакбод намуд. Иқдоми мазкурро ғамхории навбатии Пешвои миллат ба сокинони кишвар арзёбӣ намуд.

Ҳамчунин дар рафти чорабинӣ Иброҳим Мирзоев, муовини сардори Раёсати кор бо ҷавонони КҶВС, Саъдулло Қувватов - узви фаъоли Иттифоқи ҷавонони Тоҷикистон, Рафоҳати Файзалӣ ва Каримҷон Салимов ҷавонони фаъол баромад карда, аз қабул шудани пешниҳоди Тоҷикистон оид ба эълон гардидани “Даҳсолаи байналмилалии амал “Об барои рушди устувор, 2018-2028” аз ҷониби СММ сарфарозӣ намуда, омодагии худро баҳри татбиқ ва амалӣ намудани иқдоми мазкур иброз доштанд.

Дар ҳошияи аксияи мазкур иштирокчиён миннадтории худро ба Пешвои миллат ҷиҳати эълон гардидани соли 2017 Соли ҷавонон баён дошта, ин иқдомро бовариву эътимоди Пешвои миллат нисбат ба ҷавонон номиданд.

Дар охир аз ҷониби ҷавонони ташаббускор дар кӯчаву хиёбонҳои шаҳри Душанбе варақаҳои иттиллотӣ, аз ҷумла беш аз 1000 нусха номаи табрикии Дабири кулли Созмони Милали Муттаҳид Пан Ги Мун ба унвони Президенти ҷумҳурӣ, муҳтарам Эмомалӣ Раҳмон ба сокинон ва меҳмонони пойтахт тақсим карда шуд.