ҶАВОНОН
Якшанбе 24 Январ 2021 03:05
7676
Ҳар фарде, ки барои пешрафти зиндагии худ ҳамеша дар талош аст, новобаста дар куҷо буданаш фаъолият мекунад. Яке аз чунин нафарон Рустам Халифаев, зодаи шаҳри Исфараи вилояти Суғд мебошад. Номбурда пас аз хатми мактаби миёна барои беҳбудии зиндагӣ ба муҳоҷирати меҳнатӣ равон гардид.

Наздиконаш дар шаҳри Новосибирски Русия кор мекарданд. Ӯ низ тасмим гирифт, ки ба ин шаҳр равад. Тавре худи ӯ дар суҳбат гуфт, рӯзҳои аввали ба ин шаҳр рафтанаш ба мушкилоти зиёде рӯ ба рӯ гардид, ки баъдан онҳоро паси сар намуд.

“Дар рӯзҳо аввал ба бисёр мушкилиҳо дучор гаштам. Надонистани забон, кор кардан дар сохтмонҳо, рӯ ба рӯ шудан бо кормандони ҳифзи ҳуқуқ ва надонистани ҳуқуқу уҳдадориҳо бароям душвориҳо пеш меовард. Аммо бо мурури вақт ин мушкилиҳоро паси сар кардам. Доимо меҳнат мекардам, то ояндаи хубе дошта бошам. Аввал кӯшиш намудам, ки забони русиро хуб аз худ намуда, фаъолиятамро дар дигар соҳаҳо оғоз намоям”-гуфт ӯ.

Баъд аз заҳматҳои тӯлонӣ дар сохтмонҳои гуногун ба тиҷорат машғул шуд. Аз Тоҷикистон меваи хушкро дастрас намуда, онҳоро ба навъҳо ҷудо карда, ба беморхонаю муассисаҳои таълимӣ, боғчаҳои кӯдакона ва дигар муассисаҳо мерасонд. Рустам таъкид намуд, ки меваҳои кишвари мо фоиданок ва болаззатанд. Аз ҳамин сабаб дарҳол мизоҷони зиёдро пайдо карда тавонист.

Ҳамин тавр кори ӯ пеш мерафт ва талабот ба маҳсулоташ дучанд гардид. Пас аз чанд муддати фаъолият ӯро ҳамватанон ба шаҳри Красноярск барои дар мағозаҳои ин шаҳр маҳсулоти ватаниро ба савдо гузоштан, даъват карданд. Мавсуф низ пешниҳоди онҳоро рад накарда, ба Красноярск рафт ва маҳсулоти ватаниро дар мағозаҳои он шаҳр ба фурӯш гузошт. Худ низ дар яке аз мағозаҳо фурӯшанда шуд. Баъди чанд соли фаъолият дар мағоза ният кард, ки мағозаи шахсии худро кушояд ва маҳсулоти ватаниро боз ҳам бисёртар ворид созад. Ӯ ба шаҳри Улан-Уде, пойтахти Ҷумҳурии Бурятия рафта, бо меҳнати чандсолаи худ як мағозаи фурӯши меваи хушк ва тару тозаро ифтитоҳ намуд.

Аз соли 2019 то имрӯз меваҳои болаззати ватани азизамонро бо нархи нисбатан арзон дастрас намуда, ба фурӯш мемонад. Дар дил орзуи онро дорад, ки боз чанд мағозаи дигар кушода, ҳамватанони худро ба кор ҷалб намояд.

- Ҳар фарди тоҷик, ки берун аз кишвар кору фаъолият дорад, бояд ба фоидаи худ ва ҷомеа бошад. Чунки имрӯз баҳри ҷавонон шароити хубе фароҳам омадааст, ки онҳо метавонанд, кору фаъолияти худро дар хориҷи кишвар низ ба роҳ монанд,- гуфт, ҳангоми суҳбат Рустам.

Маълум аст, ки ҷомеа имрӯз ба пеш равон аст ва ҳар яки моро зарур аст, аз ин пешравиҳо самаранок истифода барем. Хоҳ дар дохили кишвар бошем, хоҳ берун аз он. Тавре ҳамсуҳбати мо изҳор дошт, надонистан забон барояш мушкили асосӣ шуда, ба душвориҳои зиёд дучор омад. Пас, имрӯз ҷавонон бояд забон омӯзанд, то дучори мушкилиҳо нагарданд.

Мо барои боз ҳам комёб гардидан ба фаъолияти кории ин ҷавон, ки дар хориҷи кишвар муваффақ гаштааст, муваффақиятҳо хоҳонем. Ва умед дорем, ки шумораи ин гуна ҷавонони соҳибкор дар хориҷ зиёд мешавад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Январ 2021 c.