Дар китобхонаи марказии шаҳри Хоруғ ба номи Ҳофизи Шерозӣ бахшида ба 120 – солагии Қаҳрамони Ҷумҳурии Тоҷикистон Шириншоҳ Шоҳтемур конференсияи илмӣ – назариявӣ баргузор гашт.

Дар чорабинии илмӣ олимони ҷавону адибон, шоирони ВМКБ, роҳбарияти китобхона ва омӯзгорону донишҷӯёни Донишгоҳи давлатии Хоруғ ба номи Моёншо Назаршоев иштироку суханронӣ намуданд.

Ба иттилои Фирдавс Имомзода, муовини мудири Шуъбаи кор бо ҷавонони донишгоҳ ҳозирин аз осору зиндагинома, шуҷоату мардонагӣ ва сарнавишти талху ширини Ш. Шоҳтемур нақл карданд.

Аз ҷумла Насим Саидраҳмонов, ассистенти кафедраи таърих ва ҳуқуқу ёвари ректори донишгоҳ оид ба шоҳкориҳои қарамони миллат суханронӣ намуда, иброз дошт, ки дар таърихи ҳар халқ аз ибтидо то охир одамоне ҳастанд, ки амалу тақдирашонро бо тақдири мардум пайваста, ҳамчун машъали фурӯзону раҳнамои халқ мегарданд:

“Бузургии ин зумраи одамон дар он аст, ки онҳо дар тӯлии зиндагиашон пеш аз ҳама манфиати оммаро дар мадди назар дошта, баҳри ҳимояи манфиатҳои миллӣ кӯшишҳои зиёдеро ба харҷ медиҳанд. Аз ин хотир, чунин одамон бо мурури замон сазовори эҳтироми хоссаи омма гашта, номбардори давлат мешаванд.

Яке аз чунин фарзандони фарзонаи миллат Ш. Шоҳтемур буда, минҷумла дар таъсиси Ҷумҳурии Мухтори Шӯравии Сотсиалистии Тоҷикистон ҳиссаи бузург дорад ва ҳамзамон мавсуф барои ташкилии давлати соҳибистиқлоли Тоҷикистон бо дигар қаҳрамонони миллат заминаҳои мусоидро фароҳам овард”.

Дар конференсия инчунин ҷавонону донишҷӯён маърӯзаҳои гуногунро оид ба фаъолияту ҷонисориҳои Қаҳрамони Ҷумҳурии Тоҷикистон ироа намуданд.