Дар шаҳри Хоруғ бо иштироки раёсати филиали Иттифоқи ҷавонони Тоҷикистон (ФИҶТ) дар ВМКБ ва ҷавонони фаъоли шаҳру ноҳияҳои вилоят конференсияи вилоятии иттифоқ баргузор гашт. Дар чорабинӣ ду масъалаи асосӣ, кору фаъолияти ФИҶТ дар соли 2019 ва тасдиқи нақшаи кории филиал дар ВМКБ барои соли 2020 мавриди баррасӣ қарор гирифтанд.

Оид ба масъалаи якум раиси филиал ва сардори Раёсати кор бо ҷавонон ва варзиши вилоят Сураҷ Чоршанбиев баромад намуда қайд кард, ки Иттифоқи ҷавонони Тоҷикистон (ИҶТ) ҷонибдори рушду инкишофи дигаргуниҳои сиёсӣ, иҷтимоӣ, иқтисодӣ ва илмию фарҳангии ҷомеа буда, самти асосии фаъолияташро баҳри созандагию пешрафт дар Тоҷикистон тақвият медиҳад.

- Барои роҳандозии ислоҳот ва дигаргуниҳое, ки манфиати тамоми шаҳрвандони ҷумҳуриро ифода менамоянд, ИҶТ ба нерӯи созандаи ҷавонон такя карда, дар таҳкиму ҳимояи соҳибистиқлолии кишвар, ҳифзу эҳёи арзишҳои миллӣ, бедорсозии ҳисси баланди худшиносӣ, номуси ватандорӣ, эҳтиром ба арзишҳои умумибашарӣ ва рушди маърифатнокии чавонон тамоми кӯшишҳоро равона мекунад.

Волоияти қонунҳои амалкунандаи кишвар барои иттифоқ муҳимтар аз ҳама буда, тамоми аъзоёни он вазифадоранд, ки дар амалӣ намудани ҳадафҳои бунёдии ИҶТ ва рисолати хеш дар назди халқу Ватан саҳми бориз гузоранд, - иброз намуд С. Чоршанбиев.

Ба гуфтаи сардори филиали ИҶТ дар Хоруғ Имомёрбек Имомёрбеков таҷрибаи ҷаҳони муосир нишон медиҳад, ки ба дастовардҳои сиёсиву иқтисодӣ, инкишофи устувори ҷомеа танҳо кишварҳои муваффақ шуданд, ки ба масоили ҷавонони таваҷҷӯҳи хоса зоҳир намуда, аз нерӯи ақлонию ҷисмонии онҳо босамар баҳра бурданд. Аз ин лиҳоз, ба сифати захираи стратегии иҷтимоӣ эътироф намудани наслҳои ояндасоз мувофиқи мақсад хоҳад буд.

Зикр гашт, ки соли гузашта варзишгарони ҷавону навраси вилоят дар 47 мусобиқаҳои варзишӣ ва 17 чемпионати сатҳҳои гуногун ширкат намуда, 217 медалро ба даст оварданд, ки аз инҳо 52 медали тилло буданд.

Аъзои дигари иттифоқ ва мудири Шуъбаи кор бо ҷавонони Донишгоҳи давлатии Хоруғ Дидоршоҳ Нарсиддинов қайд намуд, ки имсол дар Донишгоҳ марказҳои гуногуни илмӣ - иноватсионӣ кушода шуда, ҳамарӯза ҷавонони зиёди кишвар аз онҳо мақсаднок истифода мебаранд.

Дар охири конфронс барои хизматҳои содиқона ба аъзоёни фаъоли ФИҶТ аз тарафи раёсати он ифтихорномаҳо супорида шуд.