Дар як чорабинии ҷумҳуриявӣ, ки аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар боғи “Ирам”-и шаҳри Душанбе баргузор гардид, кормандони рӯзномаи “Ҷавонони Тоҷикистон” бо ҷоизаҳо қадрдонӣ гардиданд.

Дар ин ҳамоиши ҷумҳуриявии ҷавонон, ки бахшида ба рӯзи Ваҳдати миллӣ таҳти унвони “Бо Пешвои ваҳдатоварам ифтихор мекунам” ҷараён дошт, кормандони рӯзнома Шаҳло Эшонова, Басгул Иброҳимова бо нишони Аълочии матбуоти Ҷумҳурии Тоҷикистон, Фарзонаи Умаралӣ ва Сунатуллоҳ Эмомов ба ифтихорномаи Вазорати фарҳанги кишвар сарфароз гардиданд.

Чорабинии мазкурро раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раҳмонзода Абдулло ифтитоҳ намуда, аз ҷумла қайд кард, ки дар шароити имрӯзаи бисёр мураккаби ҷаҳони муосир барои ҳар як халқияту миллат истиқлолияту ваҳдати миллӣ волотарин арзиши миллӣ маҳсуб меёбанд.

“Дар Тоҷикистон арзиши ваҳдати миллӣ аз арзиши соҳибистиқлолию озодӣ кам нест. Шумо огаҳӣ доред, ки баробари ба даст омардани истиқлолият мардуми тоҷик чӣ гуна дар рӯ ба рӯи хатар қарор гирифт. Маҳз бо дахолати қувваҳои берунӣ, бо дасти фарзандони нохалаф Тоҷикистони азиз ба ҷанги шаҳрвандӣ ва мушкилтар ва нанговартар аз ин аз ин ба ҷанги бародаркушӣ кашида шуд”,-қайд намуд раиси кумита.

Дар идома ӯ гуфт, ки маҳз бо талошҳои Президенти кишвар барои аз байн бурдани ҳадафу мақсадҳои қувваҳои беруна ва нигоҳ доштани истиқлолият ва сулҳу ваҳдат боис гардид.

- Маҳз бо талоши қувваҳои беруна, ки дар сар татбиқ кардани ҳадафу мақсадҳои ғояҳои бегонаро дар сарзамини тоҷик доштанд, ҳатто истиқлолияти давлатӣ дар рӯ ба рӯи хатар қарор гирифт ва аз ҳамон лаҳза авҷ гирифтани муноқишаҳои дохилӣ, зуҳур кардани қувваҳои носолими ҷомеа, аз байн бурдани қувваҳои солим бо роҳи сӯиқасд ба ҷони олимону зиёиён ва донишмандоне, ки бояд роҳи мардумро барои оянда муайяну мушаххас мекарданд, вазъиятро печидатар менамуд ва қариб буд, ки истиқлолияти халқи тоҷик, ки баъди садсолаҳо ё зиёда аз ҳазор соли таърихи бедавлатӣ ба даст омада буд, аз даст равад. Маҳз дар натиҷаи иқдоми бениҳоят хирадмандона дар Иҷлосияи XVI Шӯрои Олии Ҷумҳурии Тоҷикистон ба ҳайси сарвари сиёсӣ интихоб гардидани муҳтарам Эмомалӣ Раҳмон истиқлолияти давлатӣ аз вартаи нобудӣ раҳо ёфт.

Сипас, раиси кумита ба гирандагони Стипендияи президентӣ дар соли 2019-2020 стипендияи президентӣ, ба хатмкунандагони курси омӯзишии “Ҷавонон пайрави Пешвои миллат” шаҳодатномаҳо тақдим намуд.