Дар бозори Корвони шаҳри Душанбе ҷиҳати расонидани муҳтавои Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон мулоқоти кормандони Кумитаи кор бо ҷавонон ва варзиши назди Ҳукумати ҷумҳурӣ бо тоҷирони бозор баргузор гардид.

Нусратулло Маҳмудзода, мутахассиси пешбари Раёсати кор бо ҷавонони Кумитаи кор бо ҷавонон ва варзиш зимни суханронӣ иброз доштанд, ки Пешвои миллат ҳамеша баҳри рушди соҳибкорӣ ва шароитҳои созгор фароҳам овардан ба соҳибкорон талошҳои созгор менамоянд. Аз ҷумла дар Паёми соли 2017 ироа кардаашон бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намуда буданд, ки аз он қариб 2000 субъектҳои соҳибкорӣ дар соҳаҳои истеҳсолӣ бархурдор гардиданд. Ва дар Паёми навбатӣ барои тақвият бахшидан ба ин раванд, зарур шумориданд, ки солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда, муқаррароти Қонуни Ҷумҳурии Тоҷикистон “Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ” ба ҳамаи мақомоти санҷишу назорат ва ҳифзи ҳуқуқ татбиқ карда шавад.

Дар идома таъкид шуд, ки барои бартараф кардани монеаҳои маъмурӣ, таъмин намудани самаранокии хизматрасониҳои давлатӣ ба соҳибкорон ва аҳолӣ Пешвои миллат ба Ҳукумати мамлакат супориш доданд, ки соли 2019 лоиҳаи Қонуни Ҷумҳурии Тоҷикистон “Дар бораи хизматрасониҳои давлатӣ”-ро таҳия ва пешниҳод намояд. Барои дастгирии минбаъдаи соҳибкорон аз ҷониби Пешвои миллат дар кишвар “300 рӯзи ислоҳот оид ба дастгирии соҳибкорӣ ва беҳтар намудани фазои сармоягузорӣ” пешниҳод гардид, ки аллакай дар ҳоли иҷроиш аст.