Дар соли сипаригардида Кумитаи давлатии сармоягузорӣ барои соҳибкорони ҷавон 200 ҳазор доллари амрикоӣ ҷудо намудааст. Дар ин бора Дилшод Ҷӯразода, роҳбари Муассисаи давлатии “Ташаккул ва рушди соҳибкории Тоҷикистон” зимни нишасти хабарии Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ дод.

Ӯ гуфт, ки дар доираи барномаи JICA, ки се сол боз дар кишвар фаъолият мекунад, ба 160 муҳоҷире, ки ба кишвар баргаштанд, ба ҳаҷми 1000 долларӣ, яъне ба маблағи 160 ҳазор доллар маблағҳои грантӣ ҷудо гардидааст.

- Зиёда аз 40 ҳазор доллар маблағҳои грантӣ барои соҳибкорони ҷавон ҷудо гардид. Ҳафтаи оянда дар шабакаҳои иҷтимоӣ барои ҷавонон грантҳои нав эълон мешавад, ки он талаботҳои худро дорад ва ҷавонон бояд аз он талаботҳо бархӯрдор бошанд, - гуфт ӯ.

Номбурда ҳамзамон гуфт, ки дар ин замина барои баланд бардоштани савияи дониши молиявии ҷавонон дар минтақаҳо курсҳои омӯзиширо роҳандозӣ кардем. Дар назди Кумита Муассисаи давлатии “Ташаккул ва рушди соҳибкории Тоҷикистон” ташкил ёфтааст, ки пеш аз ҳама мақсади он дастгирии соҳибкорони ҷавон мебошад.