Имрӯз дар толори Кумитаи миллии олимпии Тоҷикистон бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Ташкилоти ҷамъиятии “Пайравони Пешвои миллат” курси омӯзишӣ таҳти унвони “Ҷавонон - пайрави Пешвои миллат” оғоз гардид.

Дар он Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар ва донишҷӯёни фаъоли муассисаҳои олии кишвар иштирок намуданд.

Абдулло Раҳмонзода зимни суханронии хеш иброз дошт: “Мо тасмим гирифтем, ки дар ҳошияи сиёсати маорифпарваронаи Пешвои муаззами миллат чунин курси омӯзиширо доир намоем. Инчунин шуморо аз мактаби давлатдории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳравар ва воқиф созем. Шумо насли ҷавони кишвар бисёр хуштолеъ ҳастед, зеро имрӯз нафареро дар ихтиёр доред, ки дар рафтор, гуфтор, пиндор ва кирдорашон барои мову шумо намунаанд”.

Ҳамзамон гуфта шуд, ки аз рӯзҳои аввали масъулияти давлатдориро бар дӯш гирифтани Пешвои миллат давлату Ҳукумати кишвар сиёсати давлатии кор бо ҷавононро яке аз самтҳои муҳим ҳисобида, баҳри пешрафти ҳаёти ҷавонон кулли шароитҳои зарурӣ фароҳам оварда шуданд. Ҷавонон бояд аз ин ҳама самаранок истифода баранду донишу ҳунар омӯзанд ва саҳмгузори фардои дурухшони меҳан бошанд.

Ба таъкиди масъулин курси мазкур муддати се моҳ бо иштироки роҳбарони аввали вазорату идораҳо идома ёфта, баъди хатми курси омӯзишӣ иштирокчиёни он бо шаҳодатнома сарфароз гардонида мешаванд.

Таҳмина ЮСУФӢ, “ҶТ”