ҶАВОНОН
Шанбе 28 Ноябр 2020 06:36
6936
Ҳукумати кишвар зери роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои нахустини соҳибистиқлолӣ ҷиҳати тарбияву бакамолрасонии кадрҳои ҷавони лаёқатманд таваҷҷуҳи махсус зоҳир намуда, дар ин самт то имрӯз корҳои зиёдеро амалӣ намудааст.

Маҳз ҳамин сиёсати ҷавонпарваронаи роҳбарияти олии мамлакат аст, ки имрӯз кадрҳои ҷавону соҳибистеъдод дастгирӣ ёфта, дар вазифаҳои гуногуни давлатӣ кору фаъолият менамоянд ва саҳми арзандаи худро дар рушду нумуи ватани азизамон мегузоранд.

Муҳтарам Рустами Эмомалӣ аз зумраи кадрҳои болаёқатест, ки маҳз бо талошу заҳмат, фаъолияти пурсамару самарабахш ва кӯшишҳои созандааш дар роҳи ободии Ватан тавонист, ки ҳамчун ҷавони кордону ташаббускор сазовори боварии аҳли кишвар шуда, ба масъулияти баланди давлатӣ пешбарӣ гардад.

Имрӯз вақте ба дилхоҳ мақомоту идораҳои давлатӣ назар менамоем, мебинем, ки кадрҳои ҷавон масъулияти баландро бар уҳда доранд. Ин шаҳодати он аст, ки ҷавонон имрӯз бо ҳисси баланди худшиносию худогоҳӣ дар роҳи рушди кишвар саъю талош менамоянд.

Президенти кишвар муҳтарам Эмомалӣ Раҳмон дар ҳар вохӯрии хеш бо қишри ҷавони ҷомеа таъкид менамоянд, ки ҷавонон давомдиҳандаи кору фаъолияти насли калонсол ва ояндаи дурахшони кишвар буда, давлату Ҳукумат дар ҳама самт ҷиҳати рушди малакаи зеҳниву ҷисмонии онҳо чораҳои зарурӣ меандешад. Маҳз ҳамин иқдоми созандаи Пешвои миллат аст, ки ҷавонон аз имкониятҳои фароҳамгардида истифода мекунанду ба комёбиҳо ноил мегарданд.

Дар се соли фаъолияти муҳтарам Рустами Эмомалӣ ба ҳайси раиси шаҳри Душанбе пойтахти кишвар боз ҳам ободу зебо гардида, ба шаҳри орзуҳо табдил ёфт. Ин ҳама ободониву созандагие, ки имрӯз дар пойтахти кишварамон ба назар мерасад, маҳз дар заминаи фаъолияти назарраси ҳамин кадри ҷавону болаёқат ва роҳбари кордону муваффақ аст.

Санаи 17 апрели соли ҷорӣ зимни Иҷлосияи якуми Маҷлиси миллии Маҷлиси Олии Ҷумҳурии Тоҷикистон, даъвати шашум, ки дар кори он Президенти Ҷумҳурии Тоҷикистон муҳтарам Эмомалӣ Раҳмон иштироку суханронӣ намуданд, Рустами Эмомалӣ ба вазифаи Раиси Маҷлиси миллии Маҷлиси Олии Ҷумҳурии Тоҷикистон интихоб гардид, ки ин ифтихори кулли ҷавонони кишвар аст.

Имрӯз тамоми ҷавонони Тоҷикистон ифтихор аз он доранд, ки муҳтарам Рустами Эмомалӣ ҳамчун кадри ҷавону лаёқатманд ба ҳайси Раиси мақоми олии қонунгузори кишвар – Маҷлиси миллӣ таъин гардид ва бо фаъолияти софдилонаву содиқонаи хеш метавонад, баҳри рушду нумуи ҳарчи бештари кишвари азизамон саҳми арзанда гузорад. Ба вазифаи раиси Маҷлиси миллии Маҷлиси олии мамлакат интихоб шудани Рустами Эмомалӣ бори дигар аз он шаҳодат медиҳад, ки боварии роҳбарияти Ҳукумату давлат ба ҷавонон афзудааст. Пас, дар ин раванд ҳар як ҷавони кишварро мебояд, содиқона илму дониш омӯзаду бо фаъолияти назаррас дар рушди Ватан саҳмгузор бошад.

Эзоҳи худро нависед



Рамзҳо дар расм