Зиндагӣ инсонро ба маҷрои гуногуне равона месозад. Яке ба ободие даст мезанад, то нақши дасти ӯ дар он бимонад, дигаре ниҳолеро месабзонад, то роҳгузаре зери сояи он кӯфти роҳ барорад. Сеюмӣ ба ниёзмандон дасти ёрӣ дароз мекунад. Чорумин бошад, бо садои форами худ табъи мардумро болида мегардонад. Имрӯз санъаткорони мо бешуморанд ва дар барномаҳои консертии хориҷ аз кишвар низ фаъолона ҳунарнамоӣ намуда, кишвари моро ба оламиён муаррифӣ мекунанд.

Имрӯзҳо номи Манижа Сангин, тоҷикдухтари ҷавону боистеъдод дар сархати расонаҳо қарор дорад. Ҳама аз ӯ мегӯянду аз муаррифии кишвари Тоҷикистон ба оламиён. Манижа, ки аз 8-солагӣ ба эҷоди суруд машғул буд, дар озмуни “Евровидение-2021” аз номи кишвари Русия намояндагӣ мекунад. Садои форами ин сарояндаи ҷавон пас аз хондани суруди “Русская женщина” (“Зани рус”) ва дуэти “2 –Маши” барои иштирок дар “Евровидение” пешниҳод карда шуд. Суруди “Зани рус” ҳазорон тамошобинро дар ҳайрат монд. Дар назар аст, ки рӯзҳои 18 - 22 май тариқи Шабакаи якуми телевизиони Русия дар шаҳри Роттердами Нидерландия “Евровидение-2021” баргузор мегардад. Дар он аз 41 кишвар сарояндагон ширкат намуда, Манижа низ малакаи худро нишон медиҳад. Вақте номи ин тоҷикдухтарро дар қатори дигар беҳтаринҳо эълон карданд, ҳама тоҷикистониён офаринаш хонданд.

Манижа зодаи Тоҷикистон аст, аммо қисми зиёди ҳаёти худро дар Русия гузаронидааст. Ӯ 8 июли соли 1991 дар Душанбе таваллуд шуда, дар дувунимсолагӣ бо оилаи худ ба Русия мекӯчад. Дар Маскав вай дар мактаби мусиқӣ таҳсил намуда, навохтани фортепианоро омӯхт, дар озмунҳои мусиқӣ ширкат меварзид. Дар синни 16-солагӣ ба навиштани сурудҳои худ оғоз кард ва бо тахаллуси “Ру.Кола” баромад мекард. Соли 2008 албоми дебютии ӯ "Ман беэътиноӣ" ва инчунин видеои ҳамин ном бо иштироки ҳаҷвнигор Семён Слепаков баромад. Сарояндаи тоҷик, ки аз кӯдакиаш ба сурудхонӣ шавқи зиёде дошт, тасмим гирифтааст, дар ин ҷода муваффақ шавад.

Ӯ навозанда, муаллиф ва сарояндаи мустақил аст, ки бо тахаллуси “Manizha” дар шабакаҳои иҷтимоӣ маъруф аст. Ӯ ҳамеша кӯшиш мекунад, як чизи навро барои мухлисонаш пешкаш намояд. Ӯ ҳаргиз рӯҳафтода намешавад, агар ғолиб ҳам наояд. Манижа ҳамеша дар ҳаракат аст ва намегузорад, ки касе ба ӯ халал расонад. Ӯ худро ситораи машҳури дунё намешуморад, аммо кӯшиш мекунад, то дигарон ӯро ба таври маъмул донанд. Ӯ ҷасорат дорад ва доимо дар набард аст. Бо ин ҳама хислатҳои хуби худ Манижа имрӯз вирди забони ҷаҳониён гаштааст.
Баъди сурудани таронаи "Зани рус" Манижа дар яке аз суҳбатҳояш ин байтро чунин таҳлил мекунад: “Ин суруд дар бораи тағйир ёфтани ҳисси худшиносии зан дар тӯли чанд асри охир дар Русия аст". Ба гуфтаи овозхон ин суруд 8-уми марти соли 2020 навишта шудааст, аммо вай бори аввал танҳо баъд аз як сол онро иҷро кардааст. Ӯ мегӯяд, ки: “Масалан, дар ин суруд сатрҳои ҳаҷвӣ мавҷуданд: “Шумо аллакай аз 30 гузаштаед, салом, кӯдакон дар куҷоянд? Шумо дар маҷмӯъ зебоед, аммо пурхӯрӣ зебоии шуморо гирифтааст”.

Бо ҳамин суруди худ, ки бахшида ба зан-модар аст, ин тоҷикдухтар дар байни мардум машҳур мегардад. “Барои ман ширкат дар “Евровидение” як фурсати олие барои суҳбат бо ҷаҳон дар бораи чизҳои барои ман воқеан муҳим аст. Ман тоҷикам, Русия маро қабул кард ва ба воя расонд. Ман мехоҳам, ки бо сурудҳои худ кишвари худро муаррифӣ намоям, то аз фарҳанги бойи мо дигар кишварҳо низ огоҳ бошанд. Чи тавре ки мо онҳоро хуб мешиносем, бигузор онҳо низ моро шиносанд”, -гуфтааст сароянда дар яке аз суҳбатҳои худ.

Манижа мусиқӣ ва касби интихобкардаашро дар зиндагӣ аз ҳама чиз болотар медонад ва ҳаёташро бе мусиқӣ тасаввур карда наметавонад. Ӯ ҳамеша мегӯяд, ки суруд ин ҳастиаш аст. Барои ба қуллаҳои баланд расидан, ҳамеша дар талош буду ҳаст.

Дар ҷодаи санъат ба Манижа кашфи қуллаҳои баландро хоҳонем ва бигзор парвози ӯ дар саҳнаҳои ҷаҳонӣ боз ҳам болотар бошад. Ба ин бонуи ҳунар дар фаъолияти минбаъдааш муваффақияту комёбӣ хоҳонем.