ҶАВОНОН
Якшанбе 11 Апрел 2021 08:05
3461
Сармоягузорон ӯро шахси муваффақ ва бенуқсон меҳисобанд. Ӯ бо аъмоли худ собит сохт, ки барои ноил шудан ба комёбии молиявӣ дипломи маълумоти олӣ доштан чандон шарт ва муҳим нест.

Ширкатҳои машҳур стратегияи маркетингии ӯро нусхабардорӣ мекунанд, муштариёнаш аз сифати кору хизматрасонии ӯ қаноатманданд, маблағгузорон аз даромади саҳмияҳояш розиянд, Уолл-стрит барояш унвони “Писари тиллоӣ” додааст, менеҷерҳои фондҳои маблағгузорӣ кору борашро бенуқсон меҳисобанд. Dell Computer - иттиҳодияи таъсиснамудаи ӯ дорои заводҳои истеҳсоли компютер, дафтарҳои корӣ, хонаҳо ва дигар амволи ғайриманқул дар аксар гӯшаву канори сайёра мебошад.

Ҳамин тариқ, қаҳрамони навбатии мо – Майкл Делл нафарест, ки ба андешаи ӯ барои муваффақ шудан диплому маълумоти олӣ доштан шарт нест.

АҚИДАҲОИ “ТИЛЛОӢ”

Майкл Делл дар оилаи миёнаҳол ба дунё омадааст. Волидон мехостанд, ки писарашон табиб шавад. Вале Майкл дар 8-солагӣ қарор дод, ки аз идомаи таҳсил дар мактаби миёна даст мекашад ва онро дар шакли ғоибона хатм мекунад. Майкл ҳанӯз аз хурдсолӣ бо тафаккури мустақил, суботкорӣ ва маҳорати хоссаи корчалонӣ фарқ мекард.

Рӯзе Делли 12-сола бо аҳли оилааш ба моҳидорӣ рафт. Вақте калонсолон моҳӣ медоштанд, Майкл дар канори соҳил нишаста, босаброна бо арғамчинҳои махсус абзори моҳидорӣ мебофт. Калонсолон ба ҳоли ӯ хандида гуфтанд: “Чаро кори беҳуда мекунӣ? Мо на барои кор, балки барои истироҳат омадаем”. Майкли якрав бошад кори худро идома дода, танҳо дар нисфирӯзӣ онро ба анҷом расонид. Вақти ба хона баргаштан маълум гашт, ки ӯ нисбати дигарон моҳии зиёдтар доштааст. Аз он рӯз эътиборан Майкл дар ҳама гуна вазъият тибқи ин қоида амал мекард: “Агар ягон ақида писандат омад, ҳатман онро дар амал бисанҷ”.

АҚИДАҲО САМАР ОВАРДАНД

Баъди якчанд сол Майкл ба фурӯши маркаҳои таблиғотии рӯзномаҳо машғул шуд ва дар як муддати кӯтоҳ 2 ҳазор доллар ба даст оварда, нахустин компютери худро харидорӣ намуд. Ва дарҳол онро ба қисматҳо ҷудо кард, то бубинад, ки он чӣ гуна кор мекунад.

Каме баъдтар Майкл ба фурӯши рӯзномаву маҷаллаҳо пардохт. “Муҳим нест, ки ту ба чӣ кор машғул мешавӣ, муҳим он аст, ки он корро чӣ гуна анҷом медиҳӣ”, - мегӯяд Майкл. Ӯ дар ба дар намегашт, балки якчанд ҷуфти навхонадоронро пайдо менамуд, ки рӯзномаву маҷаллаҳои ӯро ба суроғаҳои дахлдор бурда мерасониданд. Ба ивази ин ӯ ба онҳо обунаи рӯзномаву маҷаллаҳоро ба таври ройгон барои ду ҳафта пешниҳод мекард. Ин дафъа Майкл аллакай 18 ҳазор доллар фоида ба даст оварда, барои худ мошини тамғаи ВМW харид. Бевосита аз ҷайбаш як қабза пулҳои нақдро баровардани ҷавони 17-сола фурӯшандаро дар ҳайрат гузошт.

ТАҲСИЛ Ё КОР?

Бо вуҷуди ҳамаи ин волидонаш аз шеваи кори ӯ чандон розӣ набуданд. Онҳо талқин мекарданд, ки Майкл ба донишгоҳи тиббӣ дохил шавад. Ва оқибат Делл ба факултаи биологияи Донишгоҳи Техас дар шаҳри Остин ҳуҷҷат супорид. Дар давоми таҳсил ӯ компютерҳои куҳнаро аз нав коркард кардаву ба фурӯш мебаровард. Утоқи ӯ дар хобгоҳ устохонаи таъмиргариро мемонд. Ӯ компютерҳои таҷдиднамудаи худро ба муштариён бо нархҳои нисбатан арзон мефурӯхт. Бағочмонаки мошини ӯ ҳамчун анбор хизмат мекард. Волидон аз чунин ранг гирифтани кор боз ҳам изҳори нагаронӣ намуданд. Падараш ба ӯ маслиҳат дод, ки аввал соҳиби ихтисоси зарурӣ гардида, сипас ба тиҷорат машғул шавад. Делл розӣ шуд, аммо баъди ҳамагӣ як моҳ боз ба фурӯши компютерҳо машғул шуд. Инак, даромади ҳармоҳааш аз ин шуғл зиёда аз 50 ҳазор долларро ташкил медод.

DELL COMPUTER СОRР

Дар нимсолаи аввали таҳсил Делл ба волидонаш гуфт, ки таҳсилро тарк хоҳад кард, чунки он ба корҳояш халал мерасонад. “Ман ширкати хусусии худро таъсис додан мехоҳам”, - гуфт ӯ ба падараш. Ин тасмим барои волидон ҳарзагӯие беш набуд, вале азми ҷавон қатъӣ буд. Ӯ ба волидон ваъда дод, ки агар ба нобарорӣ рӯ ба рӯ шавад, ба донишгоҳ бармегардад. Делл бо истифодаи тамоми маблағи сарфанамудааш ширкати хусусиашро бо номи Dell Computer Соrр таъсис дод. Он замон ӯ 19 сол дошт.

ПАРВОЗИ БОСУРЪАТИ ШУҲРАТ

Делл хонаи якҳуҷрагиеро ба иҷора гирифт. Корманди нахустинаш менеҷери 28-сола буд, ки ба корҳои молиявӣ ва маъмурӣ машғул буд. Ширкат бешак ба реклама ниёз дошт. Делл ангора (эскиз)-и нахустини ширкатро дар қуттии холишудаи питса сохт. Ӯ онро дар қоғаз нусхабардорӣ намуда, ба рӯзнома бурд. Делл аз рӯи шиори зерин амал мекард: “Ба муштарӣ на чизи дар анбор хобидаро, балки чизи барояш зарурӣ, вале нисбатан арзонро пешниҳод кун”. Ҳамин тариқ, баъди як моҳи кор ӯ 180 ҳазор доллар ва дар моҳи дуюм аллакай 265 ҳазор доллар фоида ба даст овард.

Баъди як сол ширкати ӯ аллакай дар як моҳ то ҳазор адад компютерро ба фурӯш мебаровард. Бо вуҷуди он ки сафи кормандони нав зиёд мешуд, даромадаш низ рӯ ба афзоиш ниҳода буд.

УСУЛҲОИ ҶАЛБИ МУШТАРӢ

Делл асло намехост, ки ширкати хурдакаки ӯ дар миёни ширкатҳои бузург мавқеи худро аз даст диҳад. Ин буд, ки ӯ аз усулҳои самараноктар кор гирифт. Аввал ин ки ӯ ба муштариёни худ кафолати баргардондани маблағи пардохтнамудаашонро медод, дуюм ӯ дарк мекард, ки компютер ин мояи карруфар нест, аз ин рӯ, дар сурати шикастанаш таъмири таъҷилии онро кафолат медод. Баъдан шабакаи шабонарӯзии ройгон таъсис дод, то муштарӣ бевосита бо мутахассисон дар алоқа шуда, мушкилашонро ҳал намоянд.

Он рӯзе, ки Майкл мебоист, коллеҷро хатм намояд, даромад аз фурӯши моли ширкати ӯ дар ҷаҳон ба андозаи то 70 млн. доллар дар як сол боло рафт. Ва Делл тасмим гирифт, ки аз фурӯши компютерҳои истеҳсолкунандагони ғайр даст кашида, компютерҳои истеҳсоли худиро ба фурӯш мебарорад.

“Мизоҷ бояд аз интихоби худ на танҳо қаноатманд, балки хушнуд бошад”, - мегӯяд Майкл Делл.

Шаҳло ЭШОНОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.