Шикаст дар озмунҳо такондиҳанда аст бисёриҳоро. Мағлубият дар озмунҳо боиси андуҳу нороҳатӣ аст иштирокчиёнро. Шикаст дар озмун бедор месозад хоҳиши бештари донишомӯзии ширкаткунандагонро. Бедор месозад эҳсоси ислоҳи хато ва масъулияти онҳоро. Мағлубияти пайиҳам ва гиряҳои аз таҳи қалби иштирокчиён баъдан медиҳад натиҷаи дилхоҳро. Ғолибияте, ки деринтизор ва ниҳоят азизу гиромӣ аст. Қаҳрамони моро низ пирӯзии соли сеюми иштирок ширин асту гуворо. Музаффарияте, ки озмуни “Илм-фурӯғи маърифат” дода ӯро.

Ӯ соли сеюм аст, ки дар озмуни мазкур иштирок менамояд ва соли равон бо кӯшишу заҳмати зиёд тавонист, ки пирӯзӣ ба даст орад. Вай аз рӯи номинатсияи “География” ғолиби ҷойи аввал дар соли 2024 ва маблағи сиву панҷ ҳазор сомонӣ гардид.
Мо атрофи Чутаев Бунёд, донишҷӯи курси панҷуми Донишгоҳи давлатии омӯзгории Тоҷикистон ба номи С. Айнӣ, сухан меронем. Тавре ӯ дар мавриди ин озмун мегӯяд: “Соли гузашта то даври ноҳиявӣ баромад кардам. Аз ин руҳафтода шудам ва ҳатто хеле гиря ҳам кардам, вале бо вуҷуди ин аз ҳамон рӯз назди худ мақсад гузоштам, ки соли дигар ҳатман ғолиби озмуни мазкур мешавам. Аз он вақт шуруъ кардам ба хондани адабиёти тавсияшавандаву омодагии ҷиддӣ барои он. На шаб мегуфтам, на рӯз, доимо машғули омӯзиш будам. Барои озмуни мазкур 20 адабиёт мутолиа кардам. Хушбахтона, имсол дар чор даври он сазовори ҷойи аввал гардидам, ки шодиам ҳадду канор надорад”.

Бунёд дар муваффақиятҳои худ саҳми устодон ва волидонашро хеле бузург медонад. Чун онҳо ҳамеша кумак ва дастгириаш менамоянд.

- Ин ҷо аз саҳми устодам Шаҳноза Исматова ёдрас шудан мехоҳам, чун маҳз ин нафар маро ба озмун омода кард. Ҳар чизи бароям нофаҳморо шарҳ медоду маро аз ҳолати ногувор мебаровард. Ҳамчунин, аз волидонам, ки дар роҳи расидан ба ҳадафҳоям шароиту имкониятҳо муҳайё намуданд, бисёр миннатдорам, - иброз дошт Бунёд.

Қаҳрамони мо доир ба аҳамияти баргузории озмун барои насли ҷавон, ки ояндасози ин миллатанд, чунин гуфт: “Яке аз бартариятҳои баргузории чунин озмунҳо дар он аст, ки ҷавононро ба омӯхтани илму ихтирои техникаву технологияи нав ҷалб месозад. Аз тарафи дигар, онҳо вақти худро беҳуда намегузаронанд, зимни он маблағҳои зиёд ба даст меоранду имкони ройгон дохил шудан ба дилхоҳ донишгоҳу донишкадаро соҳиб мешаванд ва инчунин бо шахсони зиёд ошноӣ пайдо мекунанд. Ин ҳама барои ҳар иштирокчӣ як рӯйдоди хубу баёдмонданӣ хоҳад буд. Махсусан диплом бо имзои Пешвои миллат муҳтарам Эмомалӣ Раҳмон барои ман беҳтарин дастовард буд”.

Ӯ, ки пайиҳам чанд сол иштирокчии озмуни “Илм-фурӯғи маърифат” аст, ба кори доварон баҳои хуб дод.

География фаннест, ки ошиқу дӯстдораш аст. Фанне, ки аз давраи мактабӣ онро меомӯзад. Фанне, ки доимо барояш чизҳои ҷолибу мароқангез дорад. Фанне, ки бо он гӯё ба тамоми давлатҳо сафар намудаву аз урфу одатҳояшон огаҳ гаштааст. Фанне, ки ҳоло омӯзгори он аст.

- Ман дар оилаи омӯзгор таваллуд шудаам. Аз ҷумла, бобоям факултети географияро, ки ҳоло дар он таҳсил дорам, хатм кардааст. Ман аз хурдӣ омӯзгори ин фан шудан мехостам ва хеле хушҳолам, ки айни ҳол дар риштаи мазкур таҳсилу ҳамчунин ба шогирдон аз ин фанни шавқовар дарс мегӯям,-таъкид дошт Бунёд.

Қаҳрамони мо зикр намуд, ки маҳз ба воситаи фанни мазкур хоҳиши сайру сайёҳати кишварҳои дунё дар ӯ пайдо шуд.
- То ҳол аз ҳудуди Тоҷикистон берун набаромадаам, лекин фикр мекунам, ки тамоми ҷаҳонро гашта бошам. Дар бораи кишвару уқёнусу кӯлу дарёҳо хеле зиёд мутолиа кардаам ва аз иқлим, фарҳанг, урфу одат, тамаддун ва табиати дигар кишварҳо огаҳ ҳастам.

Сафар кардан барои ҳамагон ҷолиб аст, масалан дидани кӯҳ, дарё, конҳои сурмаву симоб, ангишт. Барои ман инҳо хеле шавқоваранд, зеро бо ҳар он чизе, ки то ҳол хонда будам, аз наздик ошно мешавам. Дӯст дорам бо даст додани имкон аз уқёнусҳои олам, кишварҳои Малайзия, Сингапур, Индонезия, ки бо табиати зебову рангинашон одамонро бештар ба худ ҷалб мекунанд, дидан намоям, - қайд намуд Бунёд.

Ин донишҷӯи серталош пайваста пайи донишандӯзӣ аст. Ӯ вақти холии худро аксаран ба китобхонӣ, ба пайдо намудани ягон саволи географӣ ва варзиши навъи футбол мегузаронад.

Ӯ мутаваллиди соли 2002-и ноҳияи Восеъ мебошад. Ҳамчунин, баробари донишҷӯ буданаш аз соли 2021 то ҳол дар Гимназияи №4 барои хонандагони болаёқати шаҳри Душанбе ҳамчун омӯзгори фанни география кор мекунад.
Қаҳрамони мо орзу дорад, таҳсилро дар яке аз донишгоҳҳои Амрико идома дода, оянда яке аз мутахассисони беҳтарин дар соҳаи мазкур гардад ва ба кишвар баргардад.

- Дар оянда мехоҳам, ки дар тарбияи насли навраси кишвар саҳм гузорам. Вақте онҳо моро дида, даст медиҳанд ва бо доштани чунин устод ифтихор менамоянд, ин барои ман шарафи бузург аст.

Ба ӯ дар роҳи расидан ба орзуяҳояш комёбӣ мехоҳем!

Гулафшон КАРИМОВАВ, “ҶТ”