Бо ташаббуси Раёсати кор бо ҷавонон ва варзиши вилояти Суғд, 25 апрел, дар мақомоти иҷроияи ҳокимияти давлатии шаҳри Хуҷанд мизи мудаввар таҳти унвони “Мо муҳофизони имрӯзу фардои Тоҷикистон” бо ҷалби беш 100 нафар ҷавонону наврасони касбу кори гуногун доир гардид.

Чорабинии мазкур бо мақсади зиёд намудани сафи ихтиёриён барои хизмати Модар-Ватан аз ҳисоби ҷавонони синни то даъватӣ, баланд бардоштани ҳисси ватандӯстию ватанпарастии онҳо ва эҳтироми ҷавонон ба арзишҳои миллӣ баргузор шуда, зимни он гуфта шуд, ки барои насли наврас хизмат дар сафи Қувваҳои Мусаллаҳи мамлакат муҳимтарин мактаби обутоби ҳаёт мебошад. Маҳз дар ҳамин ҷо ҷавонписарон сабақи шуҷоату мардонагӣ омӯхта, муҳофизат кардани хоки поки Ватанро меомӯзанд.

Дар фарҷоми чорабинӣ наврасону ҷавонон вобаста ба мавзуи матраҳгашта фикру мулоҳизаронӣ намуда, ҷиҳати хизмат намудани ҷавонон дар сафи артиш пешниҳодҳои муфид баён карданд.