Таҳти ин унвон 19 май бахшида ба Рӯзи ҷавонон дар Донишгоҳи миллии Тоҷикистон бо ташаббуси мақомоти иҷроия ҳокимияти давлатии шаҳри Душанбе ва Раёсати кор бо ҷавонон ва варзиши шаҳри Душанбе форуми шаҳрии ҷавонон баргузор гардид.

Дар кори форум Дилбар Одилзода, муовини раиси шаҳри Душанбе, Қобилҷон Хушвахтзода, ректори ДМТ, Шоҳзод Разимзода, сардори Раёсати кор бо ҷавонон ва варзиши шаҳри Душанбе, Саймуъмин Охиров, намояндаи Кумитаи давлатии амнияти миллии Тоҷикистон, Шодком Турсунзода, сардори шуъбаи муқовимат бо коррупсияи Раёсати Агентии назорати давлатии молиявӣ ва мубориза бо коррупсия ва омӯзгорону ҷавонон иштирок доштанд.

Баъди садо додани Суруди миллӣ муовини раиси шаҳри Душанбе суханронӣ намуда, зикр кард, ки терроризм аз ифротгароӣ маншаъ мегирад ва наврасону ҷавонони солимфикри тоҷик бо дарки баланди масъулият бояд аз ҳар гуна ҳамлаҳои мафкуравӣ худро ҳифз карда, эҳсос намоянд, ки гаравидан ба гурӯҳҳои ифротию тундгаро ҷиҳати пешрафт ва шукуфоии кишвар монеаи ҷиддӣ эҷод мекунад.

Қобилҷон Хушвахтзода зимни суханронӣ дар идомаи форум оиди мавзӯи матраҳгардида ибрози назар карда, таъкид дошт, ки соли ҷорӣ аз ҳисоби хатмкунандагони Донишгоҳи миллии Тоҷикистон ҳудуди 600 нафар бо дили гарм баҳри ҳифзи марзу буми кишвар ва музаффариятҳои истиқлолияти давлатӣ барои хизмат дар сафи Қувваҳои Мусаллаҳ сафарбар карда шуданд.
Дар идома иштирокдорони дигари форуми шаҳрии ҷавонон таҳти унвони “Муқовимат ба ифротгароӣ омили муҳими рушди босуботи ҷомеа” оиди мавзӯи ифротагороӣ ва гаравидани ҷавонон ба гурӯҳҳои террористӣ маърӯзаҳо ироа намуданд.

Сайёраи ҚИЁМИДДИН, “ҶТ”