Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ варзишгари ҷавон - дастпарвари “Мактаби махсуси варзишии захираҳои олимпии №6 оид ба намудҳои гӯштин”-и шаҳри Душанбе, чемпиони ҷаҳон оид ба дзюдо миёни ҷавонон Эмомалии Нуралиро ба ҳузур пазируфтанд.

Дар ин бора сомонаи расмии шаҳри Душанбе иттилоъ додааст.

Раиси шаҳри Душанбе, Эмомалии Нуралиро, ки дар Чемпионати ҷаҳон оид ба гӯштини дзюдо байни ҷавонон иштирок карда, медали тиллоро соҳиб гардид ва парчами Тоҷикистонро баланд бардошт, таҳният гуфт.

Ҳамчун нишони қадрдонии Пешвои миллат, Президенти Ҷумҳурии Тоҷикистон ва Раиси шаҳри Душанбе, ба чемпиони ҷаҳон калиди хонаи 2 ҳуҷрагиро бо тамоми шароити рӯзгор дар пойтахт тақдим намуданд.

Раиси шаҳри Душанбе ба варзишгар дар мусобиқаҳои оянда барору музаффарият таманно намуда, иброз намуданд, ки ҷавонони бо нангу номус муаррифгар ва номбардори ватани хеш маҳсуб меёбанд ва ҳамеша зери таваҷҷуҳ ва ғамхориҳои пайвастаи Пешвои муаззами миллат қарор доранд.

Ёдовар мешавем, ки аз 7 то 12 августи ҷорӣ дар шаҳри Гуайкили Экводор Чемпионати ҷаҳон оид ба гӯштини дзюдо байни ҷавонон баргузор гардид, ки дар он Эмомалии Нуралӣ дар вазни 66 кг тавонист, ҳамаи ҳарифони худро шикаст диҳад ва унвони қаҳрамони ҷаҳонро соҳиб гардад.

“ҶТ”