Рӯзи 12-уми декабр мувофиқи нақшаи дуҷонибаи Кумитаи кор бо ҷавонон ва варзиш ва Гимназияи ҳарбии ба номи ворисони «Курӯши Кабир»-и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон мулоқоти раиси Кумитаи кор бо ҷавонон ва варзиш Абдуллозода Аҳтам Рустам бо таълимгирандагону омӯзгорон ва аскарону афсарон, масъулин ва садорати гимназия баргузор гардид.

Дар рафти мулоқот раиси Кумитаи кор бо ҷавонон ва варзиш аз вазъи таълиму тадрис ва машғулиятҳои варзишию ҳарбӣ, шароиту имкониятҳои зисту зиндагонии таълимгирандагон дар гимназия ошно шуда, бо худи онҳо дар мавриди масъалаҳои мавҷуда суҳбати озод доир намуданд:

- Шумо ҳарчи неру доред, барои ҳифзу марзу буми хеш дареғ надоред. Аммо имрӯз биомӯзед, тамрин намоед, омода шавед, чун муҳофизони ин марзу буми аҷдодӣ. Давлату Ҳукумат ҳамеша барои таълиму фаъолияти шумо шароиту имкониятҳои хубу мусоидтаринро фароҳам хоҳад овард. Аз шумо танҳо омӯзиш, тамрин, садоқат, шуҷоат ва далерию нотарсӣ дар роҳи ҳифзи меҳан талаб карда мешавад. Оромиву осоиштагӣ ва ободиву зебоии ин сарзамин аз шумо ва донишу маҳорату малака, шуҷоат, садоқат ва далерию матонати шумо вобастагии дорад,-афзуд раиси Кумитаи кор бо ҷавонон ва варзиш.

Баъдан Абдуллозода А. ба як қатор омӯзгорон ва таълимгирандагони гимназия барои фаъолияти хубу намунавияшон сипосномаву ифтихорнома ва туҳфаҳои Кумитаи кор бо ҷавонон ва варзиширо тақдим намуд.

Дар охир сардори Гимназияи ҳарбии ба номи ворисони «Курӯши Кабир»-и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, Генерал-майор, Назар Аслам Тӯра аз раиси Кумитаи кор бо ҷавонон ва варзиш барои ташрифу мулоқот ва қадрдониҳояшон изҳори сипосу миннатдорӣ намуданд.