ҶАВОНОН
Ҷумъа 20 Май 2022 10:22
8495
Ё Ҳусейн чӣ тавр дар ин ҷодаҳо комёб шуд?

Истеъдод атои Офаридгор аст, аммо на ҳама онро истифода бурда метавонанд. Қаҳрамони мо аз хурдӣ дорои истеъдоди баланди фитрӣ буд ва худ инро медонист. Маҳз дарки дуруст имкон дод, ки ӯ дар ҷодаи интихобкардааш муваффақ гардад.

Ҳусейн ҳанӯз дувоздаҳ сол дошт, ки дар ҳайати дастаи ҳаваскорони санъат машқ мекард. Бо аъзои даста ба мактабу кӯдакистонҳо мерафт ва ҳунарнамоӣ менамуд. Дар як вақт дар мактаби миёнаи махсуси мусиқии ба номи Малика Собироваи шаҳри Душанбе таҳсил мекард. Бештар суруд мехонд, гоҳо оҳанг низ эҷод менамуд. Пас аз он ки ба Донишкадаи давлатии фарҳанг ва санъати Тоҷикистон ба номи Мирзо Турсунзода шомил шуд, ҷиддан пайи эҷод гашт ва маҳорату истеъдоди хешро сайқал дод.

- Аввалин оҳангро замони донишҷӯӣ эҷод карда будам. Ҳунарманд Парвиз Пӯлодӣ ба ин оҳанг шеър эҷод карда, Самад Ғанӣ онро суруда буд. Ин оғози роҳи ман буд,-мегӯяд ӯ.

ДУРАХШИ ИСТЕЪДОД

Ҳусейн Изатиллоев, сароянда, оҳангсоз ва аккоси тоҷики муқими Қазоқистон аст. Бист сол мешавад, ки оҳанг эҷод мекунад. Натиҷаи заҳматҳояш буд, ки чанде қабл албоми ҷадидаш бо номи “Фалак” рӯнамоӣ шуд.

Ин албом фарогири мусиқиҳоест, ки барои филм пешбинӣ шудааст. Ҳамчунин, дар он мусиқиҳое ҷой дода шудаанд, ки бо асбобҳои халқӣ иҷро шуда, давоми солҳои 2000-2020 сабт гаштаанд. Дар маҷмӯъ, аз 126 мусиқӣ 15 композитсия албом сабт шудааст.

- Кӯшиш кардем, то тамоми ҳунару маҳорати хешро бо навозиши асбобҳои мусиқии кобиз, сато, соз, ғижжак, дудук, флейта, бансури, сетор, думбра, сибизги, дойраву даф нишон диҳем ва санъати шарқиёнаро ба ҷаҳониён муаррифӣ кунем, - мегӯяд Ҳусейн.

Оҳангҳои бастаи қаҳрамони мо филмҳои ҳуҷҷатии қазоқии “9 территория мира”, “Зеркальных дел Мастер”, “Узелки памяти”, “Кизилурда. Особенная земля”, “На родине тюльпанов”, “Алатау”, “Каркаралы”, “Нуркен Абдиров. Самый младший из моих сыновей”, мукаммал мегардонад.

Ҳоло Ҳусейн Изатиллоев роҳбарии ширкати “Интек Евразия-КЗ”-ро ба ӯҳда дорад. Ҳамчунин, бо “Қазоқфилм” низ ҳамкорӣ мекунад ва филмҳои ҳуҷҷатӣ танзим месозад.

- Ҳамкорӣ бо сароянда ва оҳангсози маъруф Далер Назаров истеъдоди маро сайқал дод. Албоми “Lunar Piano”, ки фарогири оҳангҳои бо асбоби мусиқии роял офаридашуда аст, далели ин гуфтаҳост. Ҳамчунин, ҳамкорӣ бо коргардони варзидаи тоҷик Бахтиёр Худойназаров роҳи маро ба сӯйи синамо ва филмофарӣ боз намуд, - гуфт ӯ.

НИГОҲИ ДИГАР

Қаҳрамони мо дар баробари оҳангсозӣ, ба аккосӣ низ шавқи беандоза дорад. Соли 2018 дар озмуни аккосии “Золотой объектив Алматы” мақоми сеюмро касб кардааст.

- Дар озмун 47 довталаб 248 акс ирсол намуда буданд. Акси ман бо номи “Бародар” дар номинатсияи “Портрети мардона” ба мақоми сеюм сарфароз гашт. Соли 2020 низ дар ин озмун иштирок карда, бо портрети “Ҳикмат” дар номинатсияи “Портрет” ба ҷойи дуюм сазовор гаштам, - бо ифтихор афзуд ӯ.

Ҳусейн шеърҳои Ҷамшед Маҳкампур, рубоиҳои Хайём, ғазалҳои Лоиқ ва Озарахшро қироат карда, манзури шунавандагон менамуд. Маҳз дастгирии мухлисон буд, ки ӯ дар ин ҷода низ муваффақ гашт ва албоме бо номи “Эхо души” таҳия намуд.

Ба андешаи ӯ миёни ҳунарҳои сарояндагӣ, навозандагӣ ва аккосӣ ҳамоҳангӣ вуҷуд дорад. Тариқи аксу навор мусиқиро метавон бо чашми сар дид. Ин жанрҳо дар алоҳидагӣ низ вуҷуд дошта метавонанд, аммо мусиқӣ онҳоро пайванди ногусастанӣ мебахшад.

- Дар ҷодаи мусиқӣ се устод дорам - Ҳикмат Ҷаватов, Соҳиб Нозимов ва Далер Назаров. Дар ҷодаи аккосӣ бошад, устодам аккоси Қазоқистон Илья Афанасьев мебошад. Ҳамеша ба ин шахсиятҳо пайравӣ мекунам, зеро онҳо роҳкушову роҳнамои мананд.

Ӯ дар оянда ният дорад, ки асарҳои хешро ба табъ расонад. Ҳамчунин, ғазалҳои шоирони муосири тоҷикро манзури мухлисон гардонад. Дар ин росто барояш барор хоҳонем.

Амони МУҲАММАД,
коромӯзи “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.