ҶАВОНОН
Панҷшанбе 30 Июн 2022 09:58
8756
Ё чӣ гуна як ҷавони тоҷик Киттикаро Хадича кард?  

Муҳаммадҷон Қарабоев, ҷавони 21 - солае аз ноҳияи Шаҳритӯси вилояти Хатлон аст, ки дар Ҷумҳурии мардумии Чин таҳсил мекунад. Пас аз паҳншавии бемории ҳамагири COVID-19 дар баробари садҳо нафар донишҷӯёни тоҷик ба Тоҷикистон баргашта, бо ҷавондухтари тайландие оила барпо мекунад.

ШУРӮИ КОР ДАР ФОНДИ “ЧИЛУЧОР ЧАШМА”

Муҳаммадҷон баъди бозгашт ва чанд моҳи бекорӣ тасмим мегирад, кореро шурӯъ кунад. Ӯ худ дар риштаи забоншиносӣ (лингвист) таҳсил мекунад, вале шавқу рағбати зиёд нисбати соҳаи иқтисод ӯро водор кард, ки дар Фонди қарзии хурди “Чилучор чашма”-и ноҳияи Шаҳритӯс аввал ба ҳайси таҷрибаомӯз ва баъдан ҳамчун коршиноси қарзӣ оид ба коркарди меваи хушк ва муҳсулоти ширӣ дар доираи барномаи “Беҳтар намудани рақобатпазирии агробизнес дар Тоҷикистон” ба фаъолият шурӯъ кунад. Чӣ гунае худи ӯ мегӯяд:

- Вақте эълони корро ёфтам, дар давоми ду моҳи таҷрибаомӯзиам тавонистам бо зиёда аз 20 мизоҷ дар ин самт корро ба роҳ монам. Хурсандиовар он буд, ки бо чанд мизоҷе кор кардам, бо маблағҳои калон сарукор доштанд. Ҳамзамон дар ин фонд тавонистам таҷрибаи кории ҳам хазинадорӣ ва ҳам муҳосибиамро сайқал диҳам.

Айни ҳол Муҳаммадҷон дар ин фонд бо наздики 50 нафар мизоҷ кор мекунад, ки масъулини фонд ва ҳам мизоҷон аз кори ӯ розианд. Чӣ гунае, ки ҳамкасбонаш мегӯянд, Муҳаммадҷон дар як муддати кӯтоҳ тавонист худро ҳамчун корманди содиқу ростқавл нишон диҳад ва ба як қатор муваффақиятҳо ноил гардад.

Фирӯз Амонов иҷрокунандаи вазифаи директори ФҚХ “Чилучор чашма” дар суҳбат бо мо гуфт, ки Муҳаммадҷон аз рӯзҳои аввали ба кор шурӯъ карданаш тавонист худро ҳамчун ҷавони пурталош бо идеяҳои нав нишон диҳад.

- Аз рӯзе, ки Муҳаммадҷон ба кор шурӯъ кард, дар кор пурмасъулият будани худро нишон дод ва идеяҳову пешниҳодҳои хуб барои беҳтар кардани кор кард. Ӯ ба синну соли ҷавониаш нигоҳ накарда, талошҳои зиёд дорад. Мо дар якҷоягӣ барои ҷалб ва осон намудани кори мизоҷон тасмим гирифтем, системаи фарқкунандаро ба роҳ монем, ки мутобиқи он мизоҷ дар аввал маблағи зиёдтар ва дар дигар моҳҳо камтар месупорад,-иброз дошт Ф. Амонов.

photo_2022-05-16_10-11-45.jpg

Номбурда муваффақияти Муҳам-мадҷонро пеш аз ҳама ба ростқавлӣ ва талошҳои зиёдаш рабт медиҳад.


ШИНОСОӢ БО ҶАВОНДУХТАРИ ТАЙЛАНДӢ

Қаҳрамони мо ҳангоми таҳсил дар кишвари Чин, бо ҷавондухтари тайландӣ бо номи Киттика шиносоӣ пайдо мекунад ва дар муддати кӯтоҳ бо исрори дӯстдоштааш, ки мегуфт бо забони чинӣ суҳбат созад, ин забонро аз худ мекунад.

- Дар аввал бо ӯ англисӣ суҳбат мекардам, чунки забони чиниро хуб намедонистам ва Киттика маро маҷбур мекард, ки бо забони чинӣ суҳбат кунам ва ҳамин гуна ин забонро беҳтар ёд гирифтам,-мегӯяд Муҳаммадҷон.

Ҳангоме ки Муҳаммадҷон ба Тоҷикистон бармегардад, алоқаашро бо Киттика қатъ намекунад ва қариб ҳамарӯза тавассути шабакаҳои иҷтимоӣ ҳамсуҳбат мешуданд. Чӣ гунае ки худи Муҳаммадҷон мегӯяд, падару модараш аз муносибати онҳо огоҳ буданд ва зиддият надоштанд.

- Як рӯз ҳангоми суҳбат волидонам гуфтанд, ки чӣ мешавад Киттикаро ба Тоҷикистон даъват кунӣ. Аз ҳамон вақт тасмим гирифтам, ки Киттикаро ба Тоҷикистон даъват кунам ва ҳамин тавр ҳам кардам. Киттика розӣ буд, вале дар аввал волидонаш розӣ набуданд, чун фикр мекарданд, ки ман бо духтарашон ҷиддӣ муносибат намекунам. Вале баъдан ҷиддӣ буданамро фаҳмида, ризоят доданд,-иброз медорад Муҳаммадҷон.

ЧӢ ГУНА КИТТИКА ХАДИЧА ШУД?

Пас аз ба Тоҷикистон омадани Киттика дар миёни чанд рӯз ин ду ҷавон бо ҳам бо расму оини мардуми тоҷик тӯйи арӯсӣ барпо мекунанд ва бо қабули дини Ислом Киттика исми Хадичаро мегирад.

- Волидонам аз Киттика пурсон шуданд, ки дини Исломро қабул кардан мехоҳад, ӯ розигии худро дод ва мувофиқи дини Ислом падарам ӯро Хадича номгузорӣ кард.
Хадича мегӯяд, расму оини мардуми тоҷик ва, махсусан либосҳои миллӣ ва тарзи дӯхти он ба ӯ писанд омадааст. Имрӯз Хадича либостҳои тоҷикиро ба бар мекунад ва ба пешвози меҳмонон мебарояд.

Муҳаммадҷон мегӯяд, дар аввал ҳамсояҳо аз тӯйи онҳо дар ҳолати “шок” қарор гирифтанд ва ба ҳамаи онҳо бисёр ҷолиб буд, ки чӣ гуна ин тасмимро хонаводаи онҳо ва Хадича гирифтанд.

Хадича, ки забони тоҷикиро намефаҳмад, имрӯз бо хонаводаи шавҳараш бештар бо имову ишора суҳбат мекунад. Вале бо шавҳараш ба забони хитоӣ, тайландӣ ва англисӣ ҳарф мезанад.

ДАРС ДАР МАРКАЗИ ЗАБОНОМӮЗӢ

Имрӯз Хадича дар маркази забономӯзӣ дар маркази Шаҳритӯс ба ҳайси омӯзгори забони чинӣ дарс мегӯяд ва аз кори худ розӣ аст. Ба ин кор ӯро шавҳараш Муҳаммадҷон талқин намудааст.

- Моҳи январи соли равон дар маҳалла тасмим гирифтанд, ки маркази забономӯзиро ба роҳ монанд ва маро роҳбарои он даъват карда гуфт, ки ба нафарҳое эҳтиёҷ дорад, ки забони хориҷиро донад. Ман барои омӯзиши забони чинӣ ҳамсарамро пешниҳод кардам. Ин пешниҳоди ман ба ӯ писанд омад ва ҳоло дар ин марказ ҳамсарам бо забони чинӣ ба толибилмон дарс мегӯяд,-гуфт ҳамсуҳбати мо.

photo_2022-05-16_10-11-57.jpg

Дар ин марказ айни замон толибилмон бо се забон, рӯсӣ, англисӣ ва чинӣ фаро гирифта шудаанд.

ҶАВОНОН БОЯД СЕРТАЛОШ БОШАНД

Муҳаммадҷон ва ҳамсараш, имрӯз дар баробари таҳсил, ҳамзамон кору фаъолият доранд. Муҳаммадҷон ба бархе аз ҷавононе, ки шикоят аз бекорӣ ва кампулӣ дар Тоҷикистон доранд, тавсия медиҳад, ки ҳеҷ гоҳ рӯҳафтода набошанд ва ҳамеша баҳри муваффақяити худ талош кунанд.


- Баъзе ҷавонон бар он назаранд, ки дар Русия пули калон кор мекунанду дар Тоҷикистон не. Ман ба онҳо гуфтаниям, ки ҳеҷ кас аз пеши худ ва бидуни талош чизе нашудааст. Мо бояд барои касе шудан талош кунем, таҷриба омӯзем ва аз ҳама асосаш пурсабр бошем. Дар коргоҳи мо нафароне буданд, ки бо 400 сомонӣ маош кор мекарданд, онҳо бо ин маош тоқат карданд, таҷрибаи зиёд гирифтанд. Ҳоло бошад, онҳо ба зинаҳои баланд расидаанд,-илова намуд Муҳаммадҷон.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Июн 2022 c.