Бо ибтикори Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо мақомоти иҷроияи ҳокимияти давлатии вилояти Хатлон, фестивали ҷумҳуриявии “Марҳабо ба Хатлон” баргузор гардид.

Дар фестивал беш аз шаст нафар ҷавонон аз минтақаҳои гуногуни ҷумҳурӣ иштирок намуда, дар доираи он иштирокчиён аз мавзеъҳои сайёҳию таърихии вилояти Хатлон, аз қабили мавзеъҳои “Ҳулбук”, оромгоҳи Мир Сайид Али Ҳамадонӣ, маркази дилхушии “Хуррамшаҳр” ва маҷмааи 2700-солагии шаҳри Кӯлоб дидан карданд.

Пас аз иштирок дар намоиши ҳунарҳои мардумии вилоят дар шаҳри Бохтар иштирокчиён, ҳамчунин дар доираи чорабиниҳои фестивал дар конфронси ҷумҳуриявӣ, ки таҳти унвони “Нақши сайёҳӣ дар рушди иқтисодии кишвар” дар Донишгоҳи энергетикии Тоҷикистони ноҳияи Кӯшониён доир гардид, фаъолона ширкат варзиданд.

Дар конфронс Махфират Хидирзода, муовини раиси вилояти Хатлон ва Нуъмон Абдуғаффорзода, раиси Кумитаи рушди сайёҳии назди Ҳукумати кишвар иштирок ва суханронӣ намуданд.

Зимни конфронс таъкид гардид, ки эълон гардидани “Соли рушди сайёҳи ва ҳунарҳои мардумӣ” имкониятҳои васеъ барои рушди туризм ва ғанӣ гардидани иқтисодиёти кишвар буда, имрӯзҳо шароиту имконот ҷиҳати рушди сайёҳӣ бисёранд ва аз онҳо истифода бояд бурд. Дар ин самт бояд ширкатҳои сайёҳӣ бештар фаъол бошанд ва таъсиси ширкатҳои нави сайёҳӣ низ ба фоидаи кор хоҳад буд.