Имрӯз бо ташаббуси Раёсати кор бо ҷавонон ва варзиши вилояти Суғд дар толори Мақомоти иҷроияи ҳокимияти давлатии ноҳияи Бобоҷон Ғафуров мизи мудаввари вилоятӣ оид ба таҷлили Рӯзи Модар таҳти унвони “Нақши зан – модар дар пешрафти ҳаёти ҷомеа” доир гардид.

Дар мизи мудаввар Мансурова Замира, мудири Бахши кор бо ҷавонон ва варзиши ноҳия, дар мавзӯи “Зан ва сиёсат”, мудири шуъбаи кор бо занон ва оилаи ноҳияи Б. Ғафуров дар мавзӯи “Нақши занону ҷавондухтарон дар рушду эҳёи ҳунарҳои мардумӣ” ва намояндаи САҲШ-и ноҳия дар мавзӯи “Нақши занону ҷавонон дар таҳкиму устувории оила” суханронӣ намуданд.

Таъкид шуд, ки мақоми зан дар оила ва ҷомеа дар таъриху тамаддуну фарҳанги гузаштаву имрӯзаи халқи тоҷик ҷойгоҳи хос дошта, дар замони соҳибистиқлолии Тоҷикистони азиз баланд бардоштани мақоми Зан-Модар дар ҷомеа нишони эҳтиром ба ин шахсият ва арҷгузорӣ нисбат ба рисолати зиндагисозии ин олиҳаи меҳрро бозгӯ мекунад.