18 феврал бо ташаббуси Кумитаи кор бо ҷавонон ва варзиш дар ҳамкорӣ бо Кумитаи кор бо занон ва оила бахшида ба 29-солагии Қувваҳои Мусаллаҳи кишвар дар толори КҶВ ҳамоиши афсарзанони мақомоти ҳифзи ҳуқуқ ва сохторҳои қудратии мамлакат дар мавзӯи "Нақши занон дар таҳкими тарбияи ватандӯстии ҷавонон ва ғояҳои арзишҳои миллӣ" баргузор гардид.

Дар ҳамоиши мазкур Дилноза Аҳмадзода, муовини раиси Кумитаи кор бо ҷавонон ва варзиш, Ҳилолбӣ Қурбонзода, раиси Кумитаи кор бо занон ва оила, Иброҳимзода Нозим, муовини вазири корҳои дохилӣ, собиқадорон Рафиқа Мӯсоева, Аскар Ҳаким ва Меҳринисо Бобобекова ҳамроҳи бонувон - хизматчиёни ҳарбӣ иштирок ва суханронӣ намуданд.

Дар оғоз Аҳмадзода Дилноза ҳамаи иштирочиёнро ба 29 -умин солгарди Қувваҳои Мусаллаҳи Ҷумҳурии Тоҷикистон табрик гуфта, ба хизматчиёни ҳарбӣ, аз ҷумла занону бонувон барои хизмати содиқонаву софдилона ва уҳдадориву масъулиятҳои минбаъдаашон барору комёбӣ таманно намуд. Номбурда таъкид намуд, ки занони шуҷои мо дар қатори мардон ба халқу ватани худ софдилона хизмат намуда, ҳисси ватандӯстӣ дар ин бонувон нисбати дигарон бештар аст.

Ҳамзамон, зикр гардид, ки мардуми тоҷик дар симои ҳар хизматчии Қувваҳои Мусаллаҳ муҳофизи худро дида, дар ин баробар роҳбарияти давлату Ҳукумати кишвар хотираи афсарону сарбозонеро, ки дар рӯзҳои мудҳиштарин ҷасорату далерӣ нишон дода, барои оромии кишвар ва осоиши халқ ҷон нисор кардаанд, абадан пос медоранд.



Дар охири ҳамоиш ба як гурӯҳ хизматчиёни ҳарбӣ сипоснома ва туҳфаҳои таъсисёфтаи кумитаи тадорукот тақдим гардид.